聖誕Party玩《Shape Up》開心收身

聖誕長假，總少不免開Party「乜乜乜」！想玩遊戲時仲可以Keep埋Fit，新推出的Xbox One體感遊戲《Shape Up》就最啱玩！表面上《Shape Up》係一套滿載好多趣味迷你遊戲的大雜燴，但實情是當中糅合了不少真正健身動作，玩完笑完真係收到身，連星級健身教練Ryan Lee試玩過後，都話Kinect感應得好準，用力多少都感應得到，想偷懶都唔得！

《Shape Up》

玩完每個迷你遊戲後都會顯示出分數及所消耗的卡路里。

在「瀑布跳水」迷你遊戲中，要跟節拍跳到浮木，並要傾斜身體避開障礙物。

迷你遊戲「特技競賽」要在驚險場面裏鬥快跑。

「蹲到月球去」要不斷做踎低起身動作，希望大家唔會玩完頭暈啦！

星級健身教練Ryan Lee覺得以遊戲包裝健身運動，可以令到一般玩家提起做運動的興趣。

模特兒試玩完後，表示估不到咁大運動量，做完即時覺得血脈沸騰！

Ryan試玩《Xbox Fitness》的健身動作，自然駕輕就熟。

遊戲畫面右側會有個白色人仔顯示運動動作，深色部分是表示正使用中的肌肉。

《Just Dance 2015》貫徹動作誇張抵死造型，繽紛色彩設計得好有節日感覺。

遊戲畀1至6人玩都得，大班朋友一齊開Party至啱。

《Shape Up》最聰明是用上甚具娛樂性的迷你遊戲來包裝，當中收錄了多個90秒完成的挑戰遊戲，就算平時唔多做Gym的玩家都會被吸引到一齊玩。筆者找來模特兒Emily試玩「極地拳擊」迷你遊戲，玩法係要跟住畫面指示拳打或膝撞，打倒在不同位置出現的冰塊，中間還要連續擊拳打低不斷掉下來的冰塊，以取得Combo連擊積分，相當好玩。

遊戲包裝辨析準確

好玩歸好玩，到底有冇真正效用？都係問問專業健身教練。星級私人健身教練Ryan Lee試玩後就讚當中的迷你遊戲同真正健身動作好相似，並用上遊戲形式包裝，可以令好多平時唔多想郁的朋友可以提起興趣做運動。遊戲配合Kinect感應器的辨認度都幾準，若然Hea玩的話，會叫你用力啲！

跑跑跳跳大挑戰

《Shape Up》迷你遊戲選擇多多，如有不斷踎低起身的「蹲到月球去」，在驚險場景下奔跑逃生的「特技競賽」或類似人肉拍拍機的「鋼琴舞步」，全部都要大家跑跑跳跳。本作場景同動作設計出色，玩多幾次都唔覺悶，而且不知不覺下，仲會燃燒不少卡路里。

到底專業健身教練定係嬌滴滴模特兒玩《Shape Up》叻啲？筆者安排一場二人對戰，玩類似跳繩的迷你遊戲「瀑布跳水」，玩家要根據畫面指示雙腳或單腳跳，並要傾斜身體越過障礙。結果Ryan教練無論在跳躍頻率跟卡路里消耗都較高，不過分數方面竟然係模特兒贏一個馬鼻，主要原因應該係時間掌握得較好，並取得較多Combo。其實輸贏都無所謂，最緊要開心，本作仲可以記錄埋大家的收身歷程，如果聖誕期間食得太多，記得玩多兩鋪先好瞓呀！

INFO

平台：Xbox One

遊戲人數：1至2人

推出日期：已推出

售價：$360

其他推介：《Xbox Fitness》跟真教練玩健身

《Shape Up》偏重娛樂，如果想正正經經跟著名教練一齊健身的話，Ryan教練覺得免費畀Xbox LIVE金會員試玩的《Xbox Fitness》會較啱玩。Ryan話外國好興睇片跟住做健身，《Xbox Fitness》除了收錄美國知名健身教練所提供的課程外，最正係可以透過Kinect感應器感應到運動時正運用哪組肌肉，然後在畫面右方顯示出來，唔怕做錯動作。而且軟件仲叻在可以隔空感應到玩家的心跳頻率，唔怕操得太盡，免適得其反。