YotaPhone 2俄國大膽雙芒

俄羅斯人被網民稱為「戰鬥民族」，全因大膽勇武；勢估唔到該國出產嘅手機都一樣咁厲害！講緊嘅就係今期熱話YotaPhone 2，此機除咗係普京送習近平的禮物外，最正就係採用雙芒設計，前面係5吋彩芒，後面仲有個4.7吋電子紙觸控屏幕，畫面可以轉前轉後，背芒又可以長着顯示資訊，相當鬼馬！

YotaPhone 2

機身採用圓角設計，驟眼睇都有幾分似Nexus S。 $5,999

YotaCover可以自訂Wallpaper，而且唔會顯示個人資料，加強私隱。

既係SIM卡槽又係音量鍵，要用特製卡針先開到。

機底設有喇叭，音量輸出夠響亮。

備有一系列EPD專屬遊戲，用黑白介面玩，效果唔差。

預載Android 4.4，介面無特別改動，似足原生。

可以改動YotaCover主題，當中包括有Facebook、Instagram。

各項YotaPanel內容都可以改動，迎合不同用家需要同習慣。

內置YotaEnergy慳電模式，提供大量慳電選項。

只要長按Home鍵再向左邊圖示一拉，就可將正面屏幕畫面傳到EPD顯示。

EPD仲可以當埋自拍鏡，自拍對晒位，一定夠準確。

YotaPanel可放置撥號、訊息、聯絡人、拍攝等快捷功能，亦可以睇電子書及回覆訊息。

其實Yota Devices早於2012年尾已經推出雙芒手機YotaPhone，可惜當時只得水貨流出。第二代YotaPhone 2終於銷售海外，香港仲係首個開賣嘅亞洲地區。講番部機，佢延續上代雙芒設計概念，正面有個5吋AMOLED屏幕，而機背除咗有鏡頭，仲有個4.7吋電子紙觸控屏幕（EPD），即係Amazon Kindle等e-Reader常用嘅芒，同樣支援Multi-Touch，操作同普通篤芒一樣。值得一提，雖然機身設有兩邊屏幕，不過手感依然唔錯；唯一擔心就係用唔到機套，要「裸跑」，幸好雙芒都用上Gorilla Glass 3防刮玻璃，都唔易刮花。

EPD芒超慳電

到底雙芒可以點玩？此機嘅黑白EPD係長期開着，用家可以隨時更換預載嘅YotaCover及YotaPanel介面，前者會顯示個人Wallpaper以及撥號、短訊、電郵等基本功能；後者就會顯示電子書、時鐘、天氣、RRS新聞等不同內容，唔使開正面屏幕就可以睇到訊息，甚至操作相關功能。用家仲可透過YotaMirror直接將正面屏幕嘅Android畫面以鏡像顯示到EPD；加上廠方預載國際象棋、數獨等多款專為EPD而設嘅小遊戲，都幾過癮！最重要係EPD比AMOLED彩芒慳電得多，廠方表示單用EPD操作一般手機功能，可以用到兩日咁上下；用EPD睇書的話，續航力更長達五日。嫌未夠喉，仲可以開埋YotaEnergy慳電模式，得15%電量時，只於EPD上使用基本功能，續航力竟然有8.5小時，相當厲害！

兼容香港4G

做得俄羅斯手機，YotaPhone 2規格當然「勇武」，用上Qualcomm Snapdragon 800 2.2GHz四核心處理器，有2GB RAM及32GB ROM，拍得住一般Android旗艦機。美中不足係不設microSD卡槽，想擴充容量就麻煩啲！值得一提，YotaPhone 2介面設有虛擬功能鍵，唔似得上代要用手勢操作Home、返回等功能，方便好多！另外，此機支援800、1,800、2,600MHz 4G LTE頻譜，兼容香港網絡，上網、下載都唔怕慢。