啱啱有電視台舉行咗視帝視后選舉，賽果都好正路，如果變形金剛都嚟個本年度最受歡迎角色選舉，相信情況都差唔多，第一位當然毫無懸念由「文哥」柯柏文（Optimus Prime）坐正，第二位你又會揀邊個？惡人代表麥加登（Megatron），定係奸到出汁嘅星星叫（Starscream）？計我話，再好打、再大隻嘅老變角色都好，都一定輸畀鄰家男孩Feel嘅大黃蜂（Bumble/Bumblebee）！

Takara Tomy Transformers MP-21 Bumble 建議零售價：$399.9

無論行版或日版貨，都有平嘴及微笑兩款面相組件，不過真心講，嘴角變化唔大，雕功似乎唔夠深刻。

行版跟多兩項Parts，分別係紀念幣及Battle Face面相組件，論玩味，後者當然吸引得多。

得到車廠認可授權，頭冚及軨冚都有Volkswagen廠徽。

整個變形過程都相當容易，榫位又夠準確，而且可動性不俗，手腳可以靈活擺動之餘，腰位都可以左右轉動，擺甫士冇難度。

MP-21嘅甲蟲車形態，可算係有史以來最神似嘅版本，如果輪胎改用橡膠製品就可無懈可擊。

史碧加嘅頭像雕功尚算可以，不過塗裝真係唔收貨，冇眼又冇嘴，又考玩家嘅加工能力？

Exo-Suit於1986年嘅《The Transformers︰The Movie》電影版出場，之後一直好少商品化，MP-21可說是完成度最高嘅版本，仲有變形Gimmick。

無論由80年代嘅元祖G1動畫，再到Michael Bay嘅電影三部曲，大黃蜂都係博派陣營中，除文哥以外最搶戲嘅角色，雖則唔係最好打、最有型，但往往係同人類最Friend嗰個，尤其是G1版本嘅可愛造型，比起其他老變角色更易入屋，唔怪得老變粉絲一直有強烈呼籲Takara Tomy將大黃蜂升上神枱，推出Masterpiece版本，與文哥、麥加登及洛迪文（Rodimus）等大牌並駕齊驅，呢個心願，終於喺今年聖誕前實現了，仲唔係老變迷最想收到嘅應節禮物？

還原Type 1神髓

G1大黃蜂最深入民心嘅地方，就係可以變成Volkswagen嘅經典甲蟲車，不過由於版權所限，以往嘅G1大黃蜂商品唔能夠做得太神似，今次嘅MP-21就唔同晒，因為攞正Volkswagen嘅「拉臣」，盒面已經標明係參照元祖甲蟲車Type 1設計而成，唔只圓碌碌嘅車身線條，就連「軨冚」及圓形頭燈等特徵都逐一忠實還原，最到位係頭冚及軨冚都有Volkswagen嘅廠徽，玩家要落足眼力了。

行版多Parts

至於機械人形態方面，亦都跟足G1嘅小個子設定，唔只肥嘟嘟，高度亦只有12cm左右，同系嘅文哥就大隻過佢一倍有多，睇得出廠方有心將佢哋比例化，入戲之餘，變身後嘅大黃蜂仲可以放入文哥嘅大貨櫃之內，更添玩味。至於牛角頭不但神似，仲有兩款面相組件任換；如果選購行版嘅話，仲會跟多一個「Battle Face」面相組件，呢款面罩Look並冇喺G1動畫出現過，只係於當時嘅海外漫畫，以及1985年嘅玩具產品現過身，今次失驚無神重現人間，夠晒Surprise！

上文講到大黃蜂咁入屋，因為識得同人類做Friend，MP-21就跟埋佢個朋友仔史碧加（Spike），不過唔係人仔咁簡單，而係Exo-Suit太空裝甲服造型，手腳可動之餘亦跟足動畫設定，可以變成飛行形態，變相一盒Boxset兩隻Figure，OK抵玩啦！

查詢：2738 8300（Hasbro HK）