應節Apps派對升溫
家陣將手機畫面射上大屏幕顯示，已經好普及；仲有幾日就到Party Time，未諗到派對有咩娛樂節目的話，不如Download一系列應節聖誕Apps，喺交換禮物同食大餐以外齊齊玩，增添聖誕氣氛。
《Google Santa Tracker》
主頁會顯示所有內容，介面相當繽紛。
呢款遊戲就用士的糖砌成障礙物，玩家要將手機左右搖擺將波板糖運送到灰色器皿內。
另外亦有一款記憶遊戲，揀中相同圖案拼埋一組即可，當然換晒同聖誕有關嘅公仔。
仲整咗套卡通短片，講聖誕老人出動。
《Despicable Me: Minion Rush》
版圖換上聖誕元素，夠應節。
可以將迷你兵團換做Santa造型，不過要用好多Coins，代價都幾高。
《White Christmas》
可以於相片加入不同聖誕元素，長按就可以取消。
影完相片唔使後製已經好靚，直接上載Share都得。
《123聖誕猜猜猜》
玩法同一般版一樣，估唔掂都仲有幾個錦囊幫手。
《Santify》
用真人相片變身聖誕老人，都好像真。
《Google Santa Tracker》聖誕倒數
Google推出嘅工具Apps向來有口碑，估唔到連應節玩樂Apps都一樣耍家。呢個《Google Santa Tracker》係為聖誕節推出，入面有計時器幫各位倒數迎聖誕節之外，仲有一系列聖誕內容，包括卡通短片、小遊戲等等，等你玩住嚟迎接聖誕。值得一讚係所有小遊戲嘅質素都超高，好似其中一個就要用糖果砌成滾珠遊戲，介面靚仔又襟玩，絕對唔係交行貨！另外，雖然依家已經可以下載呢隻App，不過Google會喺聖誕節前夕逐步開放App入面嘅內容，小記落筆時，12月23日以及聖誕正日嘅內容仍然未解鎖，究竟最終係玩啲咩就到時先知喇！
下載費用：免費
支援平台：Android
《Despicable Me: Minion Rush》迷你兵團換新裝
呢個用《壞蛋獎門人》迷你兵團擔正嘅遊戲，因應聖誕節而加入咗新元素，好似飄雪冬日版圖同關卡，就連迷你兵團都可以換成聖誕老人裝扮。玩法同以往一樣，迷你兵團要左閃右避兼跳高瞓低避開障礙物，途中仲要睇啱時機，攞香蕉同埋道具，節奏明快！
下載費用：免費
支援平台：Android、iOS
《White Christmas》過癮貼紙相
聖誕例必會同朋友影吓相，想加添聖誕氣氛，不如試吓用此App，佢除咗介面換晒做聖誕主題之外，更提供一系列得意嘅聖誕公仔，仲有接近三十多款字句畀用家加到相片上面，有埋雪景都得，保證效果夠晒聖誕Feel。
下載費用：免費
支援平台：iOS
《123聖誕猜猜猜》應節猜謎
曾經Hit爆一時嘅估字遊戲，嚟到聖誕就有別注內容。猜字內容一律變晒做聖誕相關字詞，好似聖誕快樂、報佳音、馬太福音等等，玩完肯定對聖誕典故同來源都熟悉得多。
下載費用：免費
支援平台：Android、iOS
《Santify》變身聖誕老人
想做聖誕老人，依家有機會！當然唔使大家換衫、化妝咁麻煩，用《Santify》就得。此App可拍下或匯入相片，只要輕輕調整角度，就會幫你化身成聖誕老人。除聖誕老人外，仲有聖誕婆婆、鹿仔等角色，又可以更換衣着同飾品，而且聖誕老人仲識得講嘢，鍾意的話，錄句「Merry Christmas」都冇問題。
下載費用：免費
支援平台：iOS
