北京直擊：Huawei Honor 6 Plus破格雙鏡

前晚北京798藝術區的751 D-Park竟然有過千人聚集，所為何事？原來國產大牌Huawei（華為）舉行大型發布會，慶祝Honor（榮耀）系列面世一周年，兼推出多款新產品。其中最搶眼就係Honor 6 Plus，機背特別備有雙800萬像素鏡頭，拍攝質素超佳，玩散景效果或者拍低雜訊幼滑夜景都難佢唔倒，硬件亦屬旗艦級，最平只售¥1,999，性價比超高。

5.5吋屏幕對比度、可視角均不俗，顯示效果合格。

Huawei Honor 6 Plus

發布會於北京798藝術區的751 D-Park舉行，目測有過千人參與。

華為榮耀業務部總裁劉江峰現身，講解Honor 6 Plus的功能。

以「大光圈」模式拍攝完之後可揀選焦點，能拖拉上下調校F0.95至F16的光圈效果。

「超級夜景」需要約三秒時間捕捉畫面，建議使用三腳架拍攝。

雙4G版本的microSD卡槽可以兼容nanoSIM，不過換卡需要使用卡針，稍為不便。

機背設有兩個800萬像素鏡頭，另有雙色補光燈。

機背設有網格細紋，光線照射下相當美觀。

同場加映
「榮耀盒子」支援4K影片播放及H.265解碼，標準版定價為¥298，12月23日正式開賣。

除Honor 6 Plus外，亦有入門新機Honor暢玩4X，採用自家Kirin 620八核心64-bit處理器、5.5吋屏幕及支援雙卡雙待，定價由¥799至¥1,399，性價比高，現已有售。

上年Huawei宣布推出Honor系列，3C、3X、6等機款都大賣兼贏口碑。今年乘勝追擊，推出旗艦作Honor 6 Plus，聽個名就知係Honor 6升級版，繼續用上直板圓角設計，加埋金屬機側，都幾似Honor 6。其全高清屏幕由上代5吋增大至5.5吋，可視角、對比度都更高，顯示效果達水準。另外，機背改用玻璃纖維物料，硬淨之餘，其網格暗花圖案亦有點綴作用，配合黑、白、金三種配色，設計大路。值得一讚是屏幕佔機面表面積達78.2%，機身亦只厚7.5mm、重165g，以5.5吋機種而言，已算輕巧。

兩個800萬像素鏡頭

今次發布會高潮位就係介紹鏡頭的時候，此機採用「平行雙八百萬鏡頭」，即係機背設有兩個800萬像素鏡頭，廠方表示拍攝時雙鏡頭可以同時捕捉畫面，吸光量係單鏡頭的兩倍，對焦速度仲只需0.1秒。技術聽落幾複雜，所以現場就設有體驗區畀各位試拍，實測發現鏡頭對焦及測光快而準。另外，其全新拍攝模式都好實用，例如用「大光圈」模式，就可以模擬F0.95至F16光圈效果的相片，影完相先至重新調整光圈大小，景深點玩都得。「超級夜景」模式效果亦相當好用，原理類近慢快門，按下快門後要等大概三秒先會完成拍攝，而成像雜訊的確比普通手機夜拍大幅減少。為滿足一眾Selfie精，Honor 6 Plus都備有800萬像素前置鏡頭，兼且支援10級美膚效果。

旗艦規格兼具貼心功能

規格方面，此機內置全新Hisilicon Kirin 925八核心處理器，配合3GB RAM及EMUI 3.0介面，操作固然流暢。新功能亦多，例如待機黑屏時，連按兩次「音量+」就可以啟動錄音，連按兩次「音量-」就可以快速拍攝；另支援「魅影觸控」，於黑屏時畫出指定字母便可開啟瀏覽器、聽音樂等相關功能，用法過癮！值得一提是「天際通」以及「榮耀錢包」兩個功能，前者只要事先申請，便可於指定地區漫遊時，毋須SIM卡也能自動連接當地網絡；後者則可以整合銀行帳戶，並透過NFC付款，相信係未來大勢！Honor 6 Plus會推出4G標準版及雙4G版兩個版本，前者屬電訊商定制版本，僅有16GB ROM，亦不設NFC等功能；後者則同時支援TD-LTE及FD-LTE制式，亦內置32GB ROM及NFC，定價分別為¥1,999及¥2,499，即日起至12月22日接受預訂，12月23日正式發售，不過暫未知香港推出詳情。