ACG TOYS 1/6 陳浩南還我黃金年代
「來忘掉錯對，來懷念過去」，80、90年代嘅香港，可謂黃金時代，就算GDP冇依家咁高，但係堅尼系數一定冇今日咁離譜，生活總算可以，尤其是我哋嘅軟實力，例如流行曲、電影、漫畫等等，喺東亞地區都係當時得令、炙手可熱，難道好光陰俱往矣？江湖巨人陳浩南，仲有佢嘅「生父」牛佬，由80年代至今，見證香港起跌，依然奮戰落去未言退，同屬本地薑嘅ACG TOYS就炮製出12"陳浩南Figure，既向獅子山下精神致敬，亦同全港人共勉之。
ACG TOYS 1/6《古惑仔》陳浩南 $1,280/套
（會場首批現貨，限量200套，附有牛佬親筆簽名版。）
整套「牛記」剪裁貼身，仲有洗水效果，果然有80年代風味。
紅遍80、90年代嘅K字頭波鞋，12"南哥亦都唔少得，真係似到十足十。
隨盒附有兩款頭雕，分別係年輕版（上），以及兩鬢斑白嘅中年版。
飛龍紋身都算細緻，不過牛佬認為顏色偏青，故此大貨推出時會變番藍啲，玩家唔使擔心。
古惑仔當然煙不離身，揸煙手就有兩款任換，左圖仲係招牌嘅港式彈煙手。
Figure採用主流嘅12"，即係約1/6比例打造，身形比例跟足漫畫風，長腿得嚟唔會變咗高橋陽一嘅「九頭身」咁誇張。
古惑仔應有嘅工具，南哥Figure統統有齊，留意牛肉刀仲跟埋報紙套。
整套Boxset最有Gimmick嘅道具，當然係呢套銅鑼灣街景連地台，唔知有冇粉絲入貨後，會將銅鑼灣路牌改做「雨傘大道」呢？
洪興社點只陳浩南，另一猛人「大飛」亦都被ACG TOYS睇中，試辦都做埋，希望趕得切有完成品喺Toy Soul現身啦！
自2004年嘅「TOYCON」後，標榜本土化嘅大型玩具展一直欠奉，等足10年，明日正式開幕嘅Toy Soul終於令大家圓夢，1/6 Action Figure當然係重頭炮，而除咗Hot Toys及Enterbay等早已打出名堂嘅大廠外，亦有ACG TOYS等新勢力加入，好不熱鬧！ACG Toys嘅首款作品，就係今年動漫節嘅王小虎，以新廠嚟講，質素上已經超額完成，今次再接再厲，有請銅鑼灣揸Fit人「南哥」陳浩南接捧！
歲月洗禮雙頭雕
香港嘅1/6 Action Figure水準早已冠絕全球，不過據ACG TOYS表示，近年嚟嘅題材，十之八九都係外國電影角色，其實喺港漫世界中，已經有好多深入民心、充滿集體回憶嘅經典人物，點解我哋香港人反而唔識貨？當得悉Toy Soul喺12月回歸，心水清嘅ACG TOYS就睇中咗陳浩南，皆因南哥喺12月出世，ACG TOYS仲話會喺本月20日（周六）嘅下午一點至兩點，於展區（B15）幫南哥搞生日會，南哥支持者記得準時撐場。
講番Figure本身，ACG TOYS係攞正牌同《古惑仔》嘅出版社「和平出版」合作，主筆牛佬當然有參與監修工作。原來最初嘅頭雕試辦係斯文Look，牛佬就覺得唔夠氣勢，幾經修改之後，先似依家咁夠氣勢、怒目生威。除此之外，牛佬仲提議整多個中年版頭雕，事關南哥都已經46歲，漫畫造型亦都兩鬢變白，故此今次嘅陳浩南Figure就備有雙頭雕。
街景入型入格
附件方面更加見出誠意，首先全身服飾都努力還原80年代嘅南哥造型，白底衫、牛仔褸、牛仔褲加疑似K字頭品牌波鞋，統統有齊，而且剪裁上相當貼身，唔覺有累贅情況。至於想當年古惑仔嘅搵食工具，包括牛肉刀、棒球棍、煙仔及大哥大手機都有晒，就連揸煙手都有兩款，讓玩家擺出南哥至Chok造型。唔只咁樣，ACG TOYS仲連場景都搭埋出嚟，以南哥嘅發迹地銅鑼灣為題，隨盒附有街景、地台，仲有欄杆、路牌及水龍頭，更顯大佬嘅霸氣。
老實講，除咗呢款80年代陳浩南外，筆者都想ACG TOYS炮製埋南哥以後嘅唔同造型，事關南哥故事夠晒傳奇，由銅鑼灣揸Fit人升上龍頭，亦都試過因為炒燶股票及吸毒而倒台，大跌過後識得振作起身，起起跌跌，唔係同香港自90年代後嘅發展好相似咩？仗義每多屠狗輩，香港人嘅打不死，以及是其是、非其非嘅精神，往往藏喺市井之間，而唔係粉飾太平營造得到。
facebook︰www.facebook.com/acgtoys
