Wearable產品近年熱爆，科技大牌間間都爭住出；最近就有外國細廠加入戰線，就係瑞士品牌MyKronoz，仲一次過推出ZeWatch2及ZeBracelet2兩款產品，備有健康監測功能，又可當免提之用；最特別就係設計比大廠出品有心思，絕對有驚喜！

ZeBracelet2採用手鐲設計，手腕較粗嘅男士未必戴得落。（左）
ZeWatch2用上傳統手錶設計，有黑、藍、灰、紫四色。（右）
各$899

ZeBracelet2錶帶設有咪高峰及喇叭，擺埋嘴邊就可以當免提。

充電時均需要使用專用充電夾子，略嫌不便。

App會列出顯示步數、燃燒卡路里、行走距離等數據，以顏色分門別類。

可以輸入不同提示內容，再校好時間響鬧提示，有重要事情都唔怕忘記。

錶身左右兩邊均各設兩個實體鍵，操作簡單。

可以顯示時間、日期外，亦可即時顯示步數、燃燒卡路里、行走距離等健康數據。

話說香港有代理於今年年中率先引入MyKronoz產品，打頭炮就係ZeFit智能手錶，而今次ZeWatch2及ZeBracelet2定位較高，功能亦更強。兩款產品均備有約1吋OLED單色屏幕，分別在於ZeWatch2用腕錶設計，有黑、藍、灰、紫四色矽膠錶帶揀，設計大路穩陣；而ZeBracelet2就玩手鐲概念，弧形外殼，用玫瑰金色，睇落幾似首飾，講外觀贏晒，女士合用。

支援語音控制

MyKronoz產品採用自家系統，並非近期見慣見熟嘅Android Wear，不過功能依然好齊全。除可顯示時間，當然唔少得計算步數、卡路里燃燒、步行距離或睡眠質素等健康資訊。用家可以藉藍芽連接手機、平板電腦等裝置，再將資料同步至專屬應用程式，以及制訂運動目標。另外，每當有來電或收到SMS，手錶即會震動提示，最正係錶身內置咪高峰同埋喇叭，可以當免提用。順帶一提，語音控制亦支援，Google Now、Siri等功能都用到，相當方便。

查詢：2955 5522