八核指紋國產機激鬥Huawei Ascend Mate 7 vs Meizu MX4 Pro

指紋技術以前是高科技玩意，近年逐漸走進平民百姓家，就連國產手機都開始應用，而且技術比國外大廠更先進。例如新返的兩部八核智能機Huawei Ascend Mate 7及Meizu MX4 Pro，便同樣支援嶄新的按壓式指紋解鎖，但究意邊部好啲？達人G即刻為你揭曉！

Huawei Ascend Mate 7 $4,680（a）

SIM及microSD卡從機側插入，日後還會推出雙卡版。

Meizu MX4 Pro
￥2,499（16GB）
￥2,699（32GB）
￥3,099（64GB）
（b）

入SIM要拆蓋，唔夠方便。

MX4 Pro跑分有44,200分，Ascend Mate 7則有42,819分，相差唔遠。

Ascend Mate內置「浮動按鈕」，點一點便可下達返回、鎖屏等指令。

MX4 Pro可即時執靚，並有美瞳、磨皮等好多「分唇」畀你玩！

Ascend Mate 7美顏功能唔算少，但要影完先用到，爭啲！

Ascend Mate 7的指紋鎖可用於鎖資料，用途廣泛。

MX4 Pro的mTouch鍵實為Home鍵，支援360度指紋解鎖。

第1回合：鬥操作性能：DRAW！

兩部機都是八核心，MX4 Pro採用Samsung最新Exynos 5430，由四顆2GHz的A15及四顆1.5GHz的A7核心組成；而Ascend Mate 7則用自家製Kirin 925，由四顆1.8GHz的A15及四顆1.3GHz的A7核心組成。由此可見，兩顆CPU雖個名唔同，但架構、時脈相近，所以效能相差唔大，難怪《AnTuTu》跑分兩者僅有1,381分嘅些微分別！至於操作，兩者都開發咗自家UI，抽走多餘嘅App Drawer，並提供輔助按鍵，例如Meizu叫「懸浮球」，Huawei則叫「浮動按鈕」，點一點即可叫出不同指令，方便程度不相伯仲呢！

第2回合：鬥靚芒拍攝：MX4 Pro Win！

MX4 Pro係MX4嘅加強版，屏幕加大至5.5吋，解像度仲「升呢」至2K質素，加上1,500:1對比度及全球最高嘅546ppi像素密度，畫面又靚又Sharp。另一邊廂Ascend Mate 7雖然用上6吋巨芒，但解像度只有1,080p，而且IPS技術殘影較明顯，煲劇睇波都無咁爽！拍攝方面，MX4 Pro主鏡頭有2,070萬像素，數字已完勝對手，而且前置鏡頭可拍84.4度超廣角相片，又有F2.2大光圈，並支援面部增亮、美瞳及磨皮等實時美顏功能，女仔好難唔Buy！反之，Ascend Mate 7事前美顏唔夠多選擇，要影完相先執得靚，而且機身太大部，好鬼重，舉手Selfie唔夠方便。

第3回合：鬥指紋應用：Ascend Mate 7 Win！

MX4 Pro把指紋鎖設於Home掣，並稱之「mTouch」按鍵，提倡用拇指解鎖；而Ascend Mate 7則把它設於機背，明顯為食指解鎖而設，方便程度相差不遠。兩者皆對應360度按壓式技術，即任何角度點一點手指都認到，不過MX4 Pro的指紋登記程序卻極繁複緩慢，不及對手直接簡單。用途亦高下立見，Ascend Mate 7除可用指紋鎖在熄芒時直接解鎖，還可當作快門，以及鎖定資料、程式及訪客模式之用。反觀MX4 Pro局限於鎖屏及鎖Apps上，用途唔夠廣泛喎！

達人G結論：MX4 Pro較抵玩

兩部手機好多方面都相似，但實際玩過，卻發覺兩者定位稍稍不同。MX4 Pro屏幕靚、機身輕巧，影相功能較強，男女都唔會Say No！Ascend Mate 7指紋應用較佳，但大大部加上土豪金，明顯主打男性顧客，女生未必Carry到！睇埋價錢，若比較32GB版本，MX4 Pro就算兌換港元都仲平一千蚊左右，論抵玩佢一定贏晒。惟留意此機暫時未有港版，想玩就要買水貨，或要捱少許炒價呢！