每到聖誕佳節，「賤兔」Rabbids都會失驚無神現身同你玩。今年Rabbids會以外國熱播的電視動畫《Rabbids Invasion》故事模式登錄PS4、Xbox One及Xbox 360連鏡頭感應器的體感遊戲平台，遊戲內容繼續有趣又抵死，郁手郁腳仲要學「賤兔」放聲大叫「BWAAH」，開Party又點可以唔預埋佢呢？

《Rabbids Invasion》

掟雞蛋玩法只得Xbox版本收錄！

要在限時內在畫面上找出隱藏物件，屬初級難度！

呢個笑樣同動作，會唔會令大家諗起《唐伯虎點秋香》？

玩家要學「賤兔」扮雞仔跳，場面相當搞笑。

跑扶手電梯任務中，玩家要原地跑，幫「賤兔」爬上樓梯拎糖食。

關卡以大地圖形式顯示，完成一版後先能夠開啟新版圖。

3D「賤兔」月曆

賤兔

Xbox One版

即使無睇過《Rabbids Invasion》動畫，都無阻大家投入遊戲；因為遊戲本身就係以卡通形式進行，可一面睇抵死賤格的內容，一邊玩體感遊戲，相當有趣。這套體感遊戲正式名稱係《Rabbids Invasion：The Interactive TV Show》，當中收錄了20集動畫內容，玩家可以參與其中，成為演員，身歷其境同「賤兔」一齊玩。動畫剛在11月初播放第二季故事，但第一季有成26集，點解得20集可以玩？原來之後會以下載方式推出其他關數。既然今集係以互動體感形式進行，所以無論係PS4、Xbox One或者Xbox 360都要用鏡頭先玩到，不過相比之下，PS4的PS Camera感應能力無Xbox的Kinect感應器咁強，所以PS4只支援兩人一齊玩，而Xbox版就可以四人同時體驗！

體感玩法難度唔算高

本作設有大地圖，要完成一集動畫內容先能夠開啟下一集內容，不過大家唔使擔心，《Rabbids Invasion》遊戲以大人細路都啱玩為目標，任務難度都唔算高。起初要於限定時間內在畫面上找出指定物件，或要在指定時間內跟「賤兔」擺甫士取分，又或者跟提示做指定動作、如跑步。一個人玩當然好容易，但如果幾個朋友一齊玩，好易手腳互纏，都幾搞笑。好似在商場版圖上，其中一隻「賤兔」想爬上扶手電梯拎糖食，玩家要幫佢用滅火筒配合滑板衝上扶手電梯，以及用廁所泵爬上電梯，足足擾攘幾分鐘後，先知旁邊有另一條扶手電梯，完全唔使衝，場面非常搞笑。

Xbox版內容較多玩掟蛋

遊戲有不少體感任務，事前會有位婆婆好心教大家點做，其實睇圖都會明點玩！Xbox版不單可以參與的人數多，而且任務種類亦也較多，如掟雞蛋大賽就得Xbox版先有，另獨家預載Speed Drawing模式，如果有齊兩部次世代主機的話，Xbox One版會比較着數！除了做動作之外，在遊戲中都有機會可以模仿「賤兔」經典的「BWAAH」尖叫聲；亦能透過遊戲的AR功能，「賤兔」們將會「跳出」電視屏幕走到客廳同大家一齊跳舞、一齊玩、一齊慶祝聖誕節！

買遊戲送3D「賤兔」月曆

想得到「3D Rabbids 2015年座枱月曆」？只要在今年12月31日前到全線PlayStation Platinum Shop、Sony Store或EUSGAMES購買兩套新推出的Ubisoft遊戲，就可以獲贈一個，好玩遊戲包括《Rabbids Invasion》、《Assassin's Creed Unity》以及《Far Cry 4》！

INFO

類型：體感

開發：Ubisoft Barcelona

平台：PS4、Xbox One、Xbox 360 Kinect

推出日期：已推出

售價：$300（PS4、Xbox One）、$238（Xbox 360 Kinect）

查詢：2359 7998