Acer Liquid X1親民4G多嘢玩

平價大芒4G手機近來充斥市面，想分一杯羹，博取用家青睞，Gimmick必不可少。就好似Acer近日推出的5.7吋Liquid X1就大把計仔，二千多元售價即擁有八核心CPU、Gorilla Glass 3強化玻璃等不俗硬件，其相機又可聲控影Selfie，仲有自家「AcerExtend」跨平台同步顯示技術，可於電腦睇手機畫面，用筆電鍵盤直接覆Message就夠晒方便。

5.7吋IPS高清芒以強化玻璃製，襟磨襟刮。

「AcerExtend」技術可將手機畫面於預載Win 8的電腦上實時顯示。

micro USB端子在機側音量鍵上方，細SIM及microSD插卡則藏於機身內。

黑色橡膠背殼表面有暗紋波點點綴，鏡頭下是AcerRAPID快捷鍵，一按即影相。

相片特效選項豐富，執靚晒玉照先放上社交平台。

播《大英雄聯盟》全高清預告片，畫面整體色彩鮮艷，暗位層次分明。

利用預設的「系統醫生」可隨時一鍵Kill Apps。

「Zoom Fit」介面調整功能可將畫面縮細成4吋使用，手指短都可以一手掌控。

備有AcerFloat浮動捷徑，可同時開啟行事曆、筆記本、計數機等多個小工具。

Liquid X1用上四正機身設計，黑色橡膠背殼表面有波點暗紋點綴。而高清IPS芒採用耐磨抗壓的Gorilla Glass 3強化玻璃，兼且用Zero Air Gap全貼合技術鑲嵌，可大幅消減折射反光等問題。由於其5.7吋屏幕不容易單手掃芒，故此Acer特地加設「Zoom Fit」介面調整功能，能把畫面縮小成4吋，女士纖纖玉手都一樣用到。至於效能方面，表現也不俗，其聯發科八核心MT6592處理器時脈有1.7GHz，並搭載四核心圖像處理器，睇片順滑流暢；配合支援dts-HD Premium Sound的雙前置喇叭，音色響亮有勁。

影相功能多

除播片娛樂一流外，Liquid X1的影相功能同樣趣味多多。首先機背1,300萬像素鏡頭有F1.8大光圈及支援0.3秒快速對焦，加上自家「Bright Magic」魔術補光技術，室內環境影相效果見得人；仲有簡易拍攝操控功能，可預先設定常用的影相Style，一按靚相即現；另外此機亦有時下流行的「先影相，後對焦」功能，又支援聲控切換拍攝模式，如對着收音咪說「Selfie」指令，即可轉用正面廣角鏡並自動拍照；惟筆者實測發現，反應只屬一般，都係用番按鍵較可靠。

「AcerExtend」延伸顯示

玩味噱頭浪接浪，Liquid X1原來仲名為「AcerExtend」的跨平台同步顯示之技術，能夠將手機畫面於任何預載Win 8系統的電腦上實時顯示出來，用家更可以用電腦鍵盤、滑鼠操作手機，回覆手機訊息至啱用。連結方法很簡單，只要以USB線或Wi-Fi接駁，並安裝相關程式，之後每次無線連接都可以於電腦屏幕「直播」手機畫面，介面仲可以轉向兼Resize，相當方便。