Nike Runners大召集加寧街出發

係人都知日日運動身體好，喺各項運動中，跑步就係最方便、最易Take Action嘅選擇，不過惰性呢回事，吸引力可能大過韓星，「今日唔跑住」，點解？冇人陪、唔知跑去邊、定係連跑鞋都未有？有心跑嘅，咪再畀藉口自己，尤其是潮人地帶加寧街啱啱多咗間Nike Running Experience Store，點只有Full Gear任你揀，直頭陪埋你跑，體貼成咁，算點先？

至新Hot Item
Aeroloft 800 Vest羽絨外套男裝 $1,299/女裝$1,099
集合輕巧、透氣及保暖三大功能，依家氣溫同日圓一樣持續插水，入貨正係時候。

全店佔地6,000平方呎，男、女專區各佔一半，絕對男女平等。

店內設有多組實物示範，包括Flywire（左）與Nike Zoom，以實物解釋各項功能設計。

今時今日嘅跑手服飾，唔只講究功能，仲要夠型夠In，女生們一定舉腳贊成。想知今季至型嘅跑裝應該點襯？新店就以實物示範Show畀你知。

跑姿全記錄
Nike Run Analysis嘅第一個步驟，就係輸入個人資料，當中包括你嘅跑步習慣，例如每星期跑幾多k、有冇傷患、鞋款緩震度嘅個人喜好等，今次就由Nike HK嘅技術專家Jamie（左）。

試跑前先要量度腳形，收集包括長度、闊度，以及有冇扁平足等資料。

店內特設跑步機，畀你試跑之餘，全程既會拍低，亦會即時喺大屏幕播番出嚟，至於試穿鞋款多數係Nike Free，因為以赤足體驗為設計哲學，試跑時就可更準確展示閣下嘅跑姿。

試跑過後，就會根據短片實實在在分析你嘅跑姿，從而建議有邊啲鞋款適合你之餘，仲提埋你以後練跑嘅改善方向。

由於Carol嘅跑姿都好正規，並冇明顯嘅內翻或外翻問題，而佢本人偏好中底吸震力強嘅鞋款，故此分析結果推薦佢用緩震與回彈兼備嘅LunarGlide 6。

Run Together全配套
店內特設大型地圖，成幅牆咁大，展示每次嘅練跑路線，總之以後就以加寧街為起步點啦！

鍾意跑步、又鍾意玩Instagram嘅你，大可Hashtags練跑以至比賽時嘅相片，放上「NIKEHKG」後，閣下英姿就會展示喺呢幅屏幕合體牆上。

全店有成50多個Locker，幾隊Crew都夠用，部分仲有手機充電功能，體貼到冇朋友！

TWENTY4SEVEN RUNNERS逢周二晚就會喺新店出動，陪大家練跑。報名費幾多？講呢啲，梗係唔收錢啦，有Heart最緊要！

Zoom Structure 18 Flash $1,099

鞋底中後段用咗Dynamic Support設計，大大提升支撐效果。

鞋面雖薄，但有Flywire加持，以最輕巧嘅方法加強支撐作用。

Zoom Pegasus 31 Flash $969

鞋面底部以及Swoosh商標，都用咗反光設計，夜跑特別型過人！

鏤空式無縫鞋面，唔只可以偷輕鞋身，仲可以提升舒適度。

跑步愈嚟愈Hit是常識吧，甚至由運動進化成一種潮流文化，例如朋友問你放咗工有咩節目，如果你答「返屋企煲劇」，唔好意思，真係Out晒囉，不過答案換轉係「跑步」嘅話，成件事當堂In晒、個人自然都型咗！為咗將跑步文化「火上加油」撥行佢，位於銅鑼街加寧街嘅Nike Running Experience Store，賣嘢之餘仲好有心Set咗陪跑活動及Nike Run Analysis服務，實行以新店做基地，召集同好一齊跑！話時話，各位阿Sir，我嚟加寧街一邊跑步、一邊鳩烏，唔係阻街呀，唔係跑得慢都要拉啩？

高手駐店周二領跑

新店每星期都會舉辦跑步活動，仲專登成立咗駐店跑團TWENTY4SEVEN RUNNERS，以數字為名，唔係要影射政治人物，而係想講只要你有Heart想跑步，全日24小時、無論禮拜日至禮拜六，日日都跑得。每逢星期二晚，TWENTY4SEVEN RUNNERS就會領跑，歡迎大家參加，距離大約5至8km，跑步初哥都應付得到，而且路線次次唔同，比起閣下平時一支公，喺跑慣跑熟嘅路上重重複複，自然有新鮮感得多，士氣分外高昂，邊個話跑步一定Lonely？對高手而言，Nike Running Experience Store亦計劃舉辦The Long Run及Track Day等進階跑步活動，由本地跑壇高手，包括蘇凱男、姚潔貞及尹焯熙等教路，想Upgrade自己嘅跑步功力嘅話，就要留意NikeRunningClubHK喺WeChat嘅最新資訊。

或者你會話，我都唔係住喺附近，山長水遠嚟銅鑼灣跑步，啲行李可以放邊先？新店就連呢項細節都幫你諗埋，店內唔只有50多個Locker，免費提供行李寄存服務，部分Locker仲有Android及iPhone充電線，細心得誇張！除此之外，跑完返嚟，新店仲會提供水及朱古力畀跑手補充，體貼成咁，你仲有理由唔跑咩？

步姿分析非試不可

喺你Take Action Join埋Nike齊齊跑之前，Nike Running Experience Store仲會同你做足準備，店內特設Nike Run Analysis服務，全程大約10分鐘，首先有駐店專員幫你登記資料，包括你嘅跑步習慣及鞋款偏好，仲會仔細幫你量度腳形，以免着錯鞋都唔知；之後跑手可以上跑步機實試一番，仲會拍低你嘅試跑過程；最後就會跟據你嘅試跑片段仔細分析跑姿，例如有冇出現過度內翻或外翻等問題，作為後練跑嘅改善重點，除此之外，仲會有鞋款推薦，以後買跑鞋就唔使盲舂舂。以上短片仲會電郵番畀你，等你喺社交網站Share畀朋友知，係唔係In先？

地道布置分外有Feel

Nike Running Experience Store既係一個跑步基地，仲係剔牌喺香港規模最大嘅跑步主題門市，佔地多達6,000平方呎，主要劃分成男、女專區，唔只衫褲鞋襪，就連毛巾、頭巾、手套、水樽、背囊……總之同跑步有關嘅用品，幾乎都可以喺度搵得到，店內裝潢仲充滿本土特色，例如地板就有「望右 Look Right」及「TRAM LANE」等路標，柱上又有「10k」、「15k」、「21.1k」及「42.195k」等距離牌，似足平時甚至比賽時嘅「跑街」環境，跑手置身其中，自然分外有Feel。

另一方面，如果你同我一樣都係超級波鞋精，鍾意買鞋之餘，仲鍾意打爛沙盆問到篤，研究對鞋到底用咗乜嘢新技術嘅話，Nike Running Experience Store更加非去不可，因為店內設有多組實物示範，實實在在解釋Nike各種設計功能，當中包括Flywire、Flyknit、Nike Free及Nike Zoom等。好心Nike HK就早啲開呢間新店啦，唔使我為咗睇清Nike Zoom嘅實物，狠下「殺手」解剖咗自己對Zoom Pegasus 31嘛！

快跑拍檔：夜跑反光族

今期唔只跑步大熱，夜跑仲係熱上加熱，為咗體現跑得快、仲要跑得型嘅精神，Nike今期以反光為題，為Zoom Pegasus 31及Zoom Structure 18兩個主力鞋款加推Flash版本，除咗鞋身兩側嘅Swoosh商標，就連鞋面底層都用咗反光物料製成，喺漆黑嘅跑道上成為聚焦點之餘，最重要係出於安全考慮，令途人容易察覺到閣下嘅位置，減少因碰撞而受傷嘅機會。