化腐女為神奇新神器Desire Eye

坊間自拍神器有很多，但大多集中Sell美顏功能，玩得多都厭！HTC新神器Desire Eye就爆趣得多，除實時美顏外，仲支援聲控指令、分鏡拍攝及人臉融合等功能，當中人臉融合更可讓相中人極速變臉，野獸變美女，撳個掣就得！

配備5.2吋1,080p高清屏幕及BoomSound雙前置喇叭。 $4,298

影張相就可幫貝兒變臉，或把灰姑娘特徵加到她臉上。

大玩橙白及雙藍撞色設計，感覺年輕。

視像對話支援人臉追蹤，最多可把四張人臉分割顯示。

支援「畫面分享」，可把手機畫面經視像Share畀對方睇。

一體成型設計，nanoSIM及記憶卡要從機側安裝。

僅厚8.5mm，加上圓渾機身，手感不錯！

在「分鏡拍攝」下，前後鏡頭景物可同時入鏡。

實時美顏可先睇效果後拍攝，並設有拉桿調校美化程度。

HTC RE
RE相機成支安美露咁款，的骰兼易拎。

只要安裝《RE Play》程式，任何手機都可變成RE的取景器。

孖色膠殼手感不俗

叫得做神器，無個靚樣又點氹女生買。HTC明白市場需要，所以Desire Eye不似得金屬One M8般冷冰冰，改用塑膠作材質，並大玩橙白、雙藍孖色Tone，外觀搶眼，絕非一般手機咁沉悶！手感方面，機角圓渾的它厚度僅8.5mm，即使屏幕有5.2吋，但手感依然不俗，女仔纖纖玉手拎都拎得自在！另外，此機採用一體成型設計，充電、3.5mm等介面更全經過防水處理，讓它符合IPX7防水要求，可入水運作30分鐘，帶埋去游水自拍都仲得！

廣東話聲控自拍

好多神器主打自拍功能，但前置鏡頭只得數百萬像素。Desire Eye另一破格處是前後鏡頭都有1,300萬像素，並有前置雙色閃光燈及BSI感測器，低光下都可拍攝清晰人像，夜晚自拍就唔使周圍搵光源。軟件方面亦好好玩，例如支援實時美顏，可在拍攝前率先預覽效果；又對應廣東話聲控，大聲講句「影喇喂」或「1、2、3」就可自拍，簡單到小朋友都識用！此外仲對應分鏡拍攝，可把前後鏡頭景物二合為一，成班人Usie話咁易！

貝兒變身灰姑娘

玩得神器當然想變靚啲，但若閣下條件有限，變靚難度自然較高。Desire Eye內置的人臉融合便為此而設，可把二人臉孔結合，再各取特徵。小記遠赴迪士尼試玩，拉一拉桿，貝兒就會慢慢變成灰姑娘，可以想像只要其中一方是靚女就可「化腐女為神奇」，女士必Buy！說回手機內涵，2.3GHz四核心處理器、2GB RAM、16GB ROM等規格屬中上，並兼容FDD及TD兩種4G制式，北上使用都得！講到網絡，此機視像通話都好破格，既可把目前手機畫面Share畀對方睇，又懂得分辨人臉，再在畫面分割顯示，打破以往一對一傾偈的框框！