快攻神兵Jordan CP3.VIII
作為當世知名嘅控衞高手，Clippers嘅Chris Paul一直以高速、靈活嘅打法，令對手聞風喪膽，佢嘅Signature Shoe—CP系列唔只成為佢嘅加速器，令CP話過就過之餘，仲做到易放又易收，急停冇難度，令CP化身成球場上嘅超跑。如今新一代嘅CP鞋款—Jordan CP3.VIII X就隨住NBA開季正式面世，流線鞋形已經充滿速度感，標誌着由CP帶領的Clippers，在新球季再度發動快打攻勢。
Jordan CP3.VIII X $1,199（a）
外底用咗XDR物料製成，強調耐用性，打街場都掂。
外底紋理以魚骨紋為主，全方位轉向都有可靠嘅循迹表現。
鞋頭與鞋踭都有合成物料固，藉此增加耐用性，減少鞋身變形嘅機會。
鞋身兩側用咗Fligt Web設計，索緊鞋帶後，就可以貼實腳掌撐到行。
織物鞋面唔只夠輕，喺支撐表現亦都交足貨，完全切合CP嘅高速型打法需要。
踭位加設一層墊位，加強對阿基里斯腱嘅保護。
中底「底盤」用咗韌度高、穩定性強嘅TPU製成，令CP嘅高速橫移動作做得更流暢。
鞋舌背後繡上Family Tree圖案，表明CP成功背後全賴有美滿家庭「十卜」，羨慕死人。
Kobe 9新色成雙
Kobe IX Elite XDR Victory $1,699（b）
Kobe IX Elite XDR Legacy $1,699（b）
Legacy與Victory嘅鞋舌背後，各有繡字以作標記。
高筒背後縫有九道紅線，與Kobe IX相和應之餘，亦表明Kobe系列變身高筒後，可以全面保護Kobe嘅阿基里斯腱，擺脫傷患陰影。
Kobe IX Elite係Nike Basketball旗下嘅首個Flyknit鞋款，整個鞋面都以織物結構製成。
今季Clippers繼續由Blake Griffin與Chris Paul雙星掛帥，開季成績尚算OK，取得三勝三負，三場勝仗之中，包括10月30日KO咗強隊Thunder，以及翌日贏埋有Kobe Bryant在陣嘅Lakers。不約而同，同屬Jordan Brand嘅Blake Griffin與CP都喺新球季換咗新鞋款，前者係標榜爆發力嘅Super.Fly 3，本報之前已有介紹；後者就係注重速度與靈活性嘅CP3.VIII，並且已經啱啱抵港上架。
Flight Web快放撐到行
要快先要輕，呢個道理，幾乎已成為現今籃球鞋設計嘅金科玉律，CP3.VIII當然唔會例外，無縫織物鞋面就比傳統真皮或人造皮革輕巧得多，而且結構上亦有所補強，唔會為咗追求輕量化而犧牲支撐效果，加上鞋頭與鞋踭都有合成物料加固，提升耐用程度。不過最精彩嘅設計，都係鞋身兩側用咗Flight Web，留意鞋面夾層內藏條子，與鞋帶相連，當用家索緊鞋帶後，就可貼實腳掌，加強支撐效果，呢項革命性嘅設計，亦都用喺AJ XX9、Melo M10與Super.Fly 3等鞋款身上，CP就對新鞋有此評價︰「由緩震到Flight Web，再到以橡膠處理嘅外底，都幫到我話停就停。我好了解呢款新鞋可以點樣幫到我，當我嘅對手見到佢哋時，佢哋都會知道。」
針對式前後緩震組合
瘦身成功之餘，CP3.VIII亦標榜高度穩定性，因為CP唔只擅長快放，仲有急停、轉向及高速橫移等動作，都係佢嘅強項所在，所以CP3.VIII嘅中底用咗TPU，呢種物料勝在重量輕、韌度高，當CP進行橫移動作時，都可提供充足嘅穩定作用，而且呢層TPU一直包到鞋踭，塑造成罩形保護組件，配合踭位內籠加咗一層墊位，進一步鎖緊腳踭，減少拗柴機會。至於緩震方面，前掌用咗Nike Zoom，吸震之餘仲有靈敏反應，後掌就由雙密度物料組成，中間位置係質地偏軟嘅Lunarlon，而Lunarlon嘅外圍就由稍稍提升硬度嘅Phylon包裹，做到吸震與穩定性並重。外底方面採用魚骨紋設計，配合XDR物料，抓地力高又耐用，而且無論想向任何一方急速轉向，都可發揮出色嘅循迹表現，難怪最近幾場作為Clippers嘅對手，都畀CP玩到陀陀擰、失晒方寸啦！
Kobe 9新色成雙
雖然Lakers開季至今未嘗一勝，不過令人欣喜嘅係Kobe Bryant已經全面復出，而且表現與戰意一直高企，Kobe粉絲總算有所安慰。Nike最近亦為Kobe嘅專用鞋款—Kobe IX Elite加推兩款新顏色，分別係藍色嘅Legacy及綠色嘅Victory。至於功能設計上，依然有齊內藏Flywire嘅Flyknit鞋面、Lunarlon鞋墊、高筒式鞋領以及鞋身多處嘅碳纖穩定組件，發揮輕量化、高保護性與反應度高等全面優勢。雖然筆者唔知Kobe下一場會着邊款顏色嘅Kobe 9上陣，不過同廣大嘅球迷一樣，都希望Lakers能夠盡快走出低潮，不枉Kobe一直以嚟對球隊嘅全情付出吧！
查詢：
a. 2528 0391（灣仔莊士敦道Jordan Brand Store）
b. 2520 0771（灣仔莊士敦道Nike Basketball）
