正如007一定要有Aston Martin或者積架代步，身為拉打，冇番部鐵馬傍身又點似樣？SHF嘅「新1號」拉打Masked Rider 1早喺2012年推出，由造型、可動性到附件都難以挑剔，如果有埋新旋風號（New Cyclone）一齊出動，邊有得輸？點知呢個心願，拖到兩年後嘅今日先實現得到，要大家等咗咁耐，Bandai唔會交行貨啩？

SHF New Cyclone 建議零售價：$389.9
造型比例跟足1971年嘅實物設計，而且用色亦傾向復古化，加倍入戲。

SHF Masked Rider 1 & New Cyclone
建議零售價：$489.9

兩年前推出嘅SHF新1號，頭盔上嘅綠色位置用咗金屬色，依家連同新旋風號推出嘅同綑版就改用啞綠色。

車頭嘅「豬頭罩」可以加裝一對紅色飛翼，模擬新旋風號當年嘅飛行場面。

雖然造型一樣，但係喺配色方面，淨車版（圖）與同綑版嘅頭燈位有所出入。

同綑版

錶板終於唔係空白一片，不過左邊嘅車速錶最高速刻度只有100km/h，新旋風號嘅極速明明去到500km/h喎。

SHF新旋風號剛剛抵港開售，睇嚟Bandai都幾睇重呢款新品，分為兩款Boxset推出，除咗有淨車，另一款就係包埋新1號嘅「同綑版」，如果你之前冇買到新1號，依家又想後追嘅話，「新1號+新旋風號」Boxset就啱晒你。

雙版本配色有分別

講番新旋風號本身，造型比例準確之餘，白色位置更專登用咗象牙白，藉此營造復古Feel。至於以往SHF拉打電單車必備嘅後輪油壓設計，新旋風號當然唔會冇，最抵讚係之前嘅錶板空空如也，有欠細緻，新旋風終於追加貼紙嚟填補呢個空白位，雖則貼紙嘅細緻度比唔上水貼，不過有總好過冇啦！另一方面，淨車版與同綑版嘅新旋風並非完全一樣，前者嘅頭燈罩附近塗上藍色，而同綑版就改為象牙白，Die Hard玩家會否為盡收天下兵器，一於兩款買齊呢？

新1號頭盔轉色

至於同綑版嘅新1號拉打，大致上與兩年前嘅版本一樣，有齊兩款造型頸巾、九隻造型手掌、櫻島1號嘅杖中劍，以及套喺右腳嘅「風雷電」特效組件，加上Figure本身造型頗有原著神髓，活動性又高，而且塗裝精美，例如手套與長靴都用上質感頗高嘅銀色，如果之前冇買到SHF新1號嘅話，今次真係值得追番，而且細心嘅話就會發現，同綑版新1號嘅頭盔用咗啞色處理，而兩年前嘅版本係有光澤嘅金屬色。咁講法，已有舊版本嘅玩家，會否為咗呢個小變動，買埋同綑版先安樂呢？

查詢：2433 1828（瑞華行）