NUU NU4本土大芒

依家Smartphone品牌多籮籮，不過主要都係日韓歐美同內地出品。原來，香港都有代表，講緊嘅就係本地品牌NUU Mobile，佢哋啱啱有新作NU4登場，此機定價雖然只係千零蚊，不過就備有5.5吋大芒以及800萬像素鏡頭，規格唔錯，追求性價比抑或想撐本土品牌都唔可以錯過。

$1,399

支援雙卡雙待功能，但係採用愈來愈少見的傳統大SIM。

前置鏡頭達500萬像素，更支援88度廣角。

備有3,000mAh電池，可連續播放影片8小時。

提供黑、白兩隻顏色，整個機背殼均經過磨沙處理。

拍攝介面簡單，不過亦提供色彩效果、飽和度等選項設定。

上YouTube睇OK Go新MV《I Won't Let You Down》，播放順暢，不過屏幕色水略嫌偏淡。

相信好多讀者對NUU Mobile都唔太熟悉，其實呢個香港品牌成立於2012年，之前已經推出過NU1、NU2及NU3三部手機，而NU4正正係第四代作品。一如以往舊作，新機依舊以性價比取勝，定價仍然維持喺千五蚊內，主打入門市場。雖然定價唔高，但機身手工之佳卻令人意外，機身採用大路圓角弧底設計，而機面屏幕圍邊及機背均用上磨沙塑膠物料，手感好亦唔易跣手，不過就相對較易黐上油漬，用機時要多留意。另外，機側邊框則用上炭灰色拋光物料，令全啞黑色機身得以點綴，睇落冇咁悶！

配備廣角前鏡

規格方面，NU4搭載Qualcomm Snapdragon 200 1.2GHz四核心處理器，另備有1GB RAM，效能只屬入門級別，幸好一般操作、開Apps反應都算靈敏，不過載入遊戲或佔用資源較多嘅Apps，難免要多啲時間。此外，此機嘅5.5吋屏幕雖然解像度只有1,280×720，色水亦稍淡，但勝在可視角不俗。反而值得一讚係鏡頭，後置800萬像素鏡頭出自Sony手筆，擁有F2大光圈及支援最高ISO 1,600，確保夜拍效果見得人；而前置鏡頭則有500萬像素，更支援88度廣角，比一般手機Wide得多，就算玩自拍大合照都冇問題。