元祖才是王道HT 1/6 Stormtrooper
早喺今年動漫節，Hot Toys已經公告天下將會發動Star Wars計劃，相信好多星戰迷即時覺得有煩惱，不過係幸福嘅煩惱，事關星戰角色多不勝數，到底有邊啲Character係非買不可？正如高達世界般，你總唔會由RX-78-2到最新嘅Build Burning Gundam都儲齊啩！一人有一張清單，不過相信每張清單上，都必然有佢份—「白兵」Stormtrooper。
HT 1/6 Stormtrooper
白兵喺星戰故事中嘅代表性，與Darth Vader不相伯仲，彼此喺Figure界一直人氣高企。
套裝版嘅白兵有高矮之分，分別高約28cm（左）與30cm（右）。
HT白兵以「原味」行先，故此由頭盔到胸甲線條，都保持當年嘅模糊感，未有為咗美形化而加深輪廓。
孖咇裝的高度差異，主要源自腰位嘅長短設計。
左、右膝頭都有唔同造型，跟足當年《Episode IV》嘅戲服設計。
留意腰帶並非單一材料製成，後半段是絹面材料，而鞋面仲加有摺痕，夠細心。
套裝獨有配件，包括圖中嘅重型步槍，以及尚未曝光嘅老鼠機械車。
無論單裝或套裝，都會附有雷射步槍（上）與手槍各一支，以及七款造型手掌。
左腰掛有真皮槍袋，不過話時話，電影中嘅白兵槍袋好多時都空空如也，你又有冇發覺到？
專為白兵而設嘅新地台，造型令人諗起Death Star與Star Destroyer嘅內部場景。
每逢一班白兵群起出動，尤其是喺Death Star列隊嗰一幕，最能展現白兵獨有嘅魅力。
發售小資料
Clone Trooper（EP II、III）
Clone Trooper（The Clone Wars）
Snowtrooper（EP V）
Scout Trooper（EP VI）
星戰角色之多，就算同《魔戒》（The Lord of the Rings）三部曲加埋前傳相比，絕對不相伯仲，分分鐘猶有過之，除咗Skywalker父子（包括Darth Vader）、Han Solo、Chewbacca、Princess Leia及Yoda等主角固然係Figure化嘅大熱之選，身為「嘍囉」嘅白兵，無論對HT或玩家而言，同樣唔出唔安樂，即使佢嘅身份就如拉打世界中嘅嘰嘰兵，行先死先，仲要一句對白都冇，但係黑白分明嘅出位賣相，加上每逢大場面都必不可少嘅戲份，尤其是喺Death Star列隊恭迎Emperor Palpatine嘅壯觀一幕，白兵喺星戰世界中嘅代表性，絕對與Darth Vader睇齊，何況George Lucas又喺前傳三部曲以至動畫故事中加重藥，為白兵嘅來龍去脈大造文章，令呢個角色變得更有故事性，試問又有邊位星戰粉絲唔中白兵毒呢？
粗中有細難度更高
白兵造型眾多，今次HT推出嘅屬於元祖版本，即係1977年《Episode IV︰A New Hope》嘅設定。其實呢個款式唔只美國嘅Sideshow，好多廠商都以唔同比例Figure化，不過同電影造型總係有啲出入，最大原因係以上產品喺某程度上都將白兵美形化。想當年，唔好話冇3D，就連CG都只係起步階段，唔似依家咁樣，可以大幅度執靚畫面，而當年嘅道具製作比依家簡陋得多，故此唔少白兵戲服都會出現唔對稱等「穿崩」現象；為求原汁原味，一向「靚慣」嘅HT，今趟都大膽跟足原著「特色」，唔會有過分雕琢，例如胸甲保留前後分件，中間有明顯嘅罅隙，尤其是頭盔保留原著嘅圓碌碌線條，唔會畫蛇添足將佢拉直變Sharp，務求讓玩家重拾最初接觸星戰電影時嘅「初戀」感覺。
還原原始美，唔代表求其，反之HT版嘅白兵比其他同類產品，做工上更仔細、更考功夫，最明顯嘅地方係白色裝甲表面做足多層光油處理，喺同類商品之中，HT嘅「白滑」程度最高，最有原著神髓！另一方面，素體本身着咗一套用尼龍製成嘅黑色貼身衣，並非表面噴黑，甚至以黑色原膠示人咁求其，忠實還原當年戲服嘅質感。除此之外，腰帶後半段用咗絹面材料製成，並非一件過嘅啤膠製品，增加層次感，仔細程度唔到你唔服。
高矮拍檔行孖咇
為咗追求原味，HT白兵唔只喺造型細節上大花心機，甚至諗出行「孖咇」呢招，就係分為單裝與套裝雙版本推出。前者以一個高約30cm嘅1/6白兵Figure為主，套裝就有兩個白兵Figure，除咗單裝嘅30cm高版本，另一個高約28cm，如此配搭皆因當年電影選角時未有要求演員高度一致，故此每逢有白兵列隊或者孖咇巡邏時，都會顯得高度參差，套裝版本就還原呢個有趣場面。附件方面，無論單裝或孖裝，都附有七款造型手掌、一個真皮槍套，以及雷射步槍與手槍各一支，留意雷射手槍喺電影中並冇出場，只係喺電影海報或者造型宣傳照中現過身，眼利嘅HT一於做埋；至於套裝就加重料，附有兩項額外配件，分別是一支重型步槍，以及一部老鼠機械車（Mouse Droid）。對超級Die Hard嘅星戰迷而言，相信苦惱之處唔在於買單裝或套裝，而係為咗還原白兵列陣嘅浩瀚場面，唔知要買幾多個白兵先排到陣呢？
白兵多面睇
雖然白兵個個造型一樣，但隨時代不同亦各有演變，例如在前傳（EP II、III）的共和國歲月中，當時的白兵左右膝甲對稱之餘，頭盔頂部中央還有一道凸起的弧形組件；至於動畫故事「The Clone Wars」中的白兵頭盔，中間部分更變成尖角，至於頭盔底部左、右類似通風口的圓形裝置則被刪去。另一方面，來到EP IV、V、VI的故事中，也有不同種類的白兵出現，當中包括在EP V登場的Snowtrooper，以及EP VI的Scout Trooper等。相信在明年上畫的EP VII，George Lucas便會為各位星戰迷炮製出全新的白兵造型吧！
