泰國直擊：6吋Ascend Mate 7秒速解鎖

自從iPhone 5s推出Touch ID之後，就掀起指紋認證熱潮，唔少Android手機都加入指紋辨識器，不過要上下狂掃，用落的確唔夠Touch ID方便！家陣就唔同咁講，事關華為（Huawei）剛於曼谷搞記招介紹嘅Ascend Mate 7，特別於機背加入按壓指紋識別感應器，放上手指就可瞬間解鎖，而且仲能夠將私密相片、機密檔案用指紋鎖住，安全指數爆燈。此機性價比高，有6吋大芒同八核心處理器都只售$3,780，筍到暈！

$3,780

記者會喺曼谷W Hotel舉行，場外仲擺咗個巨型Huawei商標，好搶眼。

機身用上大量鋁材，手感好，又紮實。

機側按鍵都換上金屬物料，回彈力都唔錯。

需要使用卡針先開到SIM卡及microSD卡槽，稍為不便。

認證過程簡單，將手指重複印上辨識器五次即可，另可儲存五組指紋。

預載Emotion UI 3.0介面，通知欄會根據訊息顯示時間順序排列，顯示更清晰。

機背備有1,300萬像素鏡頭，除有濾鏡等功能外，亦新增「全對焦」，可以拍攝後先至揀相片焦點。

指紋儲存喺晶片嘅「Trustzone」，認證過程亦有「Secure OS」加密金鑰保護，確保資料安全。指紋辨識器仲可以當快門鍵咁用，Hold大約兩秒就會拍攝，方便自拍。

華為東南亞地區部總裁楊蜀當然要撐場，亦有上台介紹新機功能。

將機身向上一揈，選項窗口就會向下移，好就手。

泰國人出名好客，大會請來當地著名歌手Yaya Ying表演，氣氛超好。

Ascend Mate 7於9月頭喺德國IFA展覽上首次曝光，內地早前正式開賣，據講銷情唔錯。今次華為嘅曼谷記者招待會邀請咗泰國、台灣、香港等地傳媒出席，目標當然係東南亞市場。新機到手，一如其他Smartphone，都係大路嘅機面設計，同之前兩代Ascend Mate一樣玩大芒，有個6吋屏幕，解像度提升至1,080p全高清級數，加上採用日本JDI出品嘅IPS-NEO技術，低功耗之餘，可視角仲高過傳統IPS屏幕，效果唔錯。唯一要彈就係屏幕色系偏暖，幸好內置「色彩溫度」，用家可以自行調校屏幕色溫。

指紋加密保私隱

翻轉機身，驟眼睇確實有幾分似HTC One Max，皆因微孤機背同樣用上鋁合金物料，手感、手工都唔錯，而激似位在於1,300萬像素鏡頭下面、面積達9.16×9.16mm嘅指紋辨識器；雖然設計同One Max相似，不過就唔使用手指頭又捽又掃，輕輕一掂就得，反應超快，效果拍得住Apple Touch ID功能。由於指紋辨識器設於機背，所以手持機身時可以順手用食指認證，好就手。值得一提，解鎖時用家係唔需要事先着芒，手指一掂就會隨即解鎖兼開着屏幕，比起iPhone要先着芒後掃指紋慳咗一步；另外，用家亦可以將相片、音樂、影片或者其他檔案放入「保險櫃」，又或者鎖定指定應用程式同埋設立訪客模式，必須用指紋先可以解除鎖定，相當安全。

特大電池支援反向充電

另外要一讚係雖然有個6吋大芒，不過屏幕佔機面比例達83%，左右邊框縮減至2.9mm，加上7.9mm厚度，令機身比同級機款輕巧得多。為方便用家單手使用，於是預載「單手操作」功能，只須輕輕一揈機身，機面輕觸功能鍵就會向左或向右移動，選項視窗亦會向下移，配合常見嘅縮細版本虛擬鍵盤，操作更就手。至於規格，就採用Kirin 925八核心處理器，系統會因應用家運行嘅程式而自行調整核心運作，令效能同續航力俱兼顧。此外，此機內置4,100mAh大電池，支援反向充電，相信用足一日冇問題。用家最關心當然係發售詳情，港版定價$3,780，即日有售，有黑、銀兩色；而稍後亦會推出採用3GB RAM搭32GB ROM雙卡版本，仲出埋金色，不過未有定價，想唔想等就視乎個人需要！