玩轉哈囉喂平價雙卡啱影鬼

萬聖節鬼門關大開，嘩鬼出籠，海洋公園更變成群魔聯舞大本營，個個嘩鬼叫，謀殺唔少記憶體！想拍低同伴驚魂未定的一刻？唔使下下買旗艦手機嘅，二千蚊有找嘅入門機一樣做得到，例如最近推出嘅Moto G、LG L Bello Dual及Sony E3 Dual，就喺四核心處理器及雙卡雙待功能以外，各自提供唔同嘅好玩拍攝「分唇」，帶埋佢哋入去玩，保證相片「智」盞鬼！

$1,798（a）

用「自動HDR」模式拍攝，相片曝光準確，鬼怪樣子及服飾均細緻呈現。

支援慢動作高清錄影，過山車快速駛過一刻可逐格重看。

配備800萬像素鏡頭及LED補光燈。

喇叭由機底移至屏幕兩邊，聲音更響亮。

「多啦A夢哈囉喂派對」有好多角色別注場景，Selfish族有排玩！

$1,598（b）

握住拳頭就啟動倒數自拍，唔使掣，減低手震機會。

提供多重濾鏡，個掣就營造到不同相片效果。

電池容積達到2,540mAh，而三部受測手機中只得此機可換電。

Rear Key背掣與鏡頭相連接，下方音量掣更可當作快門使用。

現場妖怪超過一千隻，唔怕影到手軟，最怕影到爆卡！

$1,598（c）

內建LED補光燈，可惜後置鏡頭只有500萬像素，稍稍失色。

此機唔防水，但奇怪係電池有鐵片保護，因此無得換電。

透過AR Fun功能替Model加入恐怖五官，完成後仲驚嚇過隔籬演員！

用Timeshift Burst縮時連拍31張相片，妖怪恐怖一面全部攝入鏡！

「升呢」影鬼 Moto G

海洋公園「哈囉喂全日祭」由朝玩到晚，機動遊戲以至七大鬼屋任你玩、任你影，所以一部夜攝功能夠強嘅手機好重要。Moto G出到第二代，鏡頭像素由500萬升級至800萬像素，加上LED補光燈，夜拍本身已具備一定質素；難得佢仲支援「自動HDR」模式，能自動識別現場環境，繼而緩減光位及推光暗位，好讓細節完美重現。測試所見，雖然公園好多地方只有微弱燈光，但Moto G拍出來嘅鬼怪卻清晰可見，部分連血絲都睇到，重溫時保證更加驚人！

叉爆可用足一日

數到其他拍攝「分唇」，連環快拍、觸控對焦及全景模式等全部有齊；而為方便各位捕捉瞬間景物，此機仲對應720p慢動作高清錄影，畫面逐格慢鏡重播，就算過山車咁快都難逃佢法眼！特別一提，其5吋屏幕為受測三機之中最靚，既有1,280×720解像度，又用上IPS技術，加上新設置嘅前置雙聲道喇叭，播片時聲音特別出眾，最啱用嚟聽番大家啲尖叫聲。另外，都預咗大家玩足一日，此機叉爆電後勉強可用足24小時，咁就唔怕影影吓無電咁掃興。

SPEC

制式︰GSM、WCDMA

處理器︰Qualcomm Snapdragon 400 1.2GHz四核心

記憶體︰1GB RAM、8GB ROM，支援microSD

屏幕︰5吋IPS（1,280×720解像度）

鏡頭︰前置200萬像素、後置800萬像素

對外連接︰藍芽4.0、microUSB、Wi-Fi

電池容量︰2,070mAh

作業系統︰Android 4.4.4

體積︰145.1×70.7×11mm

重量︰149g

手勢自拍LG L Bello Dual

除驚嚇元素外，海洋公園亦兼顧大細路需要，推出亞洲首個以多啦A夢為主題嘅「多啦A夢哈囉喂派對」，一眾角色全部換上哈囉喂新裝，保證女生們由入場自拍到離場。L Bello Dual係完全為自拍而設，支援Gesture Shot手勢自拍功能，只需攤開手掌然後握成拳頭，系統即會啟動自拍倒數，各位可善用當中3秒擺Pose，配合前置鏡頭補光燈，自拍自然零失誤。

支援語音拍攝

手勢以外，此機仲提供其他自拍方法，例如按動機背Rear Key下嘅音量掣，就可當作快門使用；另外系統又支援語音拍攝，隨口講聲「Chez」或「Smile」即可進行拍攝，連掣都唔使，方便到暈！執相係此機另一賣點，除咗裁剪、旋轉、光暗及飽和度等基本玩法外，仲預載懷舊、戲劇、黑白、中央聚焦及移軸等多重濾鏡，輕鬆就可為現場嘅時光機、隨意門場景添上過癮效果。

SPEC

制式︰GSM、WCDMA

處理器︰MediaTek MT6582 1.3GHz四核心

記憶體︰1GB RAM、8GB ROM，支援microSD

屏幕︰5吋（854×480解像度）

鏡頭︰前置100萬像素、後置800萬像素

對外連接︰藍芽、microUSB、Wi-Fi

電池容量︰2,540mAh

作業系統︰Android 4.4.2

體積︰138.1×70.6×10.7mm

虛擬成魔Sony Xperia E3 Dual

海洋公園是次動員大批人力，過千位演員化身成白骨精、蜘蛛女、吸血殭屍等中西妖怪，並於哈囉喂期間日夜輪流演出。想完美捕捉佢哋，就要靠Xperia E3 Dual；事關此機對應Timeshift Burst縮時連拍，系統會喺按下快門前後各一秒間，高速拍攝31張相片，畀大家篩選出最滿意一張，魑魅魍魎們就能以最驚嚇樣貌示人！

恐怖主題供下載

現場所見，每個演員嘅化妝皆十分逼真，不過若閣下想融入其中，又未必需要化妝，用Xperia E3 Dual內置嘅AR Fun趣味效果一樣得。佢可以將虛擬物件同實景結合，最新就有「恐怖」主題供下載，自動識別人臉並加入恐怖五官，玩完連Model自己都話嚇親，呢個哈囉喂必玩！至於其他拍攝功能，就包括美肌、柔焦連快、防手震及全景模式等，照顧周到；唯一要彈嘅係4.5吋屏幕比其他兩部細，取景自拍無咁爽！