不經不覺，HT嘅旗艦店Secret Base啱啱一歲生日，掌舵人Howard就喺SB搞慶祝Party，廣邀一班忠實粉絲之餘，仲搵埋兩位終極級收藏家，以及出晒名係玩具狂迷嘅名導郭子健，同大家分享玩Figure，甚至改裝Figure嘅心得。不過講到高潮位，一定係壓軸出場嘅Star Wars「白兵」Stormtrooper系列，絕對係失驚無神嚇親人；Han Solo與Chewbacca發表咗都唔夠一個月，勢估唔到HT嘅第二波星戰大軍又殺到，仲要即晚就喺SB接受訂購，Howard兄，星戰迷前世欠你好多錢咩？

Howard係出名嘅星戰狂迷，如今終於攞到星戰嘅Figure版權，果然分外肉緊，急不及待推出埋白兵了！

產品資料詳情，包括武器附件及用料都未有公布，不過筆者現場目測發現，白兵裝甲嘅色澤與質感，都同電影中嘅形象似到十足，個人認為真係高過美國廠幾班。

SB一歲Party當晚，有成約100位粉絲到賀，墟冚到呢！

白兵一出，誰與爭鋒？郭導就即刻舉機狂影一番。

郭導唔只畀面出席，仲帶埋自己改裝嘅Figure，同大家分享玩Figure嘅心得。

超級粉絲到場傾玩具經，最吸睛係佢哋嘅家駒Figure囉，絕晒版，想後追都難。

言歸正傳，HT出白兵又得唔得先？老老實實，到截稿為止，好多詳細資料HT都未肯公布，只知有單裝及雙人裝出售，後者有兩個白兵，一高一矮，Howard當晚解畫，話電影中嘅白兵高度都好參差，所以有高矮行孖咇嘅設計，不過好多星戰狂迷事後猜想，因為《Star Wars Episode IV》嘅尾段，Skywalker與Han Solo潛入Death Star，就係喬裝白兵救Princess Leia，呢段戲會否就係Howard嘅靈感來源，咁講法，正式派貨時，會唔會有機會跟埋Skywalker及Han Solo嘅頭雕呢？希望唔係筆者及一眾玩家幻想太多，Howard你會幫我哋實現願望嗎？