早前Hot Toys嘅RoboCop終於派貨，原本唔少既嫌貴又擔心塗裝走樣嘅玩家，收貨後都紛紛轉軚，喺討論區搵到唔少相似評語︰「有買貴，冇買錯」；仲有之前冇落訂嘅玩家，依家搞到心大心細，好唔好捱炒價後追？如果你心有同感嘅話，依家咪再Miss Chance了，因為HT啱啱加推埋戰損版嘅鐵甲威龍（RoboCop Battle Damaged Version），唔只夠晒實戰Feel，仲有似到O嘴嘅「半邊」頭雕，「龍迷」又再義不容辭跌錢了！

HT MMS265 RoboCop（Battle Damaged Version）
零售價︰$1,880
預訂價︰$1,830
推出日期︰明年第二至第三季
（同期另有MMS266 RoboCop Battle Damaged Version & Alex Murphy套裝接受預訂，零售價$2,890，預訂價$2,725）

據筆者記憶所及，真係唔記得有廠商出過1/6嘅Murphy Figure，呢次HT都可算係破天荒。

據官方資料所述，Murphy嘅高度與RoboCop相若，不過關節位較多，去到30個。

雖然係同一人，但Murphy嘅頭雕表情，就比RoboCop寬容得多。

電影中私營保安公司OCP（Omni Consumer Products）嘅標誌，清楚縫喺衫袖之上。

Murphy係雙槍手，所以Boxset附有兩支手槍。

頭部做工真係冇得輸，由頭雕神情到後腦嘅機械位，都做到一絲不苟。

爆甲位置觸目皆是，最厲害係爆甲底部嘅細節位都做埋，細心到五體投地。

整個Figure高約30cm，至於關節數目就有25個。

除咗常用嘅Auto 9手槍，戰損版仲跟埋第二集用過嘅Pauza P50狙擊步槍。

仲記得RoboCop喺第一集片尾嘅最後武器嗎？就係由拳頭伸出嚟嘅針頭囉。

就與MMS202及MMS203一樣，右邊大髀設有開合式槍架，傳神重現RoboCop嘅招牌拔槍甫士。

雖然《RoboCop》係1987年嘅作品，至今已經有27年歷史，不過好多70後、80後都奉為荷里活科幻經典，甚至90後都後追嚟睇，原因除咗「機設」實在太正，玩盡半人半機械呢個概念之餘，劇情仲好發人深省，例如警隊運作竟然可以外判？人死後連尊嚴都冇埋，條屍畀大企業私有化，點處置都得？最難忘當然係最後一幕，當鐵甲威龍受制於電腦內設嘅警令，同良心之間出現重大分歧，內心掙扎到手腳唔協調嘅一幕，唔知香港嘅執法人員有冇同感呢？

眼神冇得輸

《RoboCop》咁有Gimmick，唔只吸引影迷，仲有好多玩具商打佢主意，出過無數模型、Figure，不過一直都冇任何廠商攞到男主角Peter Weller嘅1/6 Figure肖像權，直到今年HT終於成功破例，推出市場上首款「有樣見人」嘅1/6 RoboCop。回想男主角Alex Murphy變成RoboCop後，頭部只係保留到面容，後半部就變成機械，初初睇都幾恐怖，不過隨住劇情發展，就會戥Murphy唔底、戥佢可憐。HT就捉到晒呢個神髓，頭雕由Yulli及JC.Hong呢對黃金組合出手，分別負責雕工與塗裝，首先細節上真係無懈可擊，藍眼睛、深眼窩、直鼻樑、櫻桃嘴等五官都拿捏準確，就連冇眉，以及頭殼與機械連接處嘅青筋等位置都做埋出嚟；筆者最欣賞係Yulli及JC.Hong都摸透咗Murphy呢個角色嘅心理狀態，佢已經被洗腦，腦袋理應空白一片，故此成部戲都差唔多木無表情，但係偏偏仲有少少情感，尤其是對家人嘅回憶殘存落嚟，唯一表達到佢嘅哀傷，就係憂鬱過梁朝偉嘅眼神，HT唔只做到足，仲加埋眉頭緊鎖呢招，就算你冇睇過《RoboCop》，唔知劇情講乜，睇見呢個頭雕，都會知道RoboCop係一個悲傷嘅男人。

超仔細戰損處理

話明係戰損版，今次嘅裝甲當然唔似之前嘅MMS202及MMS203咁完整令立立，或者你會問，MMS202及MMS203都跟咗一件戰損版胸甲啦，呢款MMS265又有咩唔同？唔同就多喇，因為上臂、前臂、大腿、小腿都統統係新件，唔只有複雜嘅舊化塗裝，而且滿布裂痕同子彈窿，仲要連裂痕裹面嘅細節位都Show埋出嚟，難度比MMS202及MMS203更加高。附件方面，招牌武器Auto 9有兩把，一把係合金製品，勝在質感高，另一把係塑膠製，冇咁重，前者最啱放入大髀槍架；後者因為輕，拎上手都唔會「手軟」，唔怕甫士難Hold。另外仲有Pauza P50狙擊步槍，以及三罐嬰兒食品，都係戰損版嘅新增Parts，更添玩味。

回到受襲前

咁難得先攞到Peter Weller嘅肖像權，淨係出戰損版嘅光頭Look，嘥啲喎，所以HT一併做埋Murphy受襲前嘅警員造型，老實講，由於電影中嘅戲服設計唔算好特別，所以亦都唔係今次Figure嘅亮點，吸引之處都係在於頭雕方面，唔只完完整整有頭髮，而且眉頭放鬆咗，雙目亦都有神咗，令成個表情都變得人性化，絕對唔係用戰損版個頭雕加番頭髮就了事，而係百分百重新製作。另一抵讚之處，就係電影中Murphy好鍾意用手指轉槍，HT就做咗專用嘅造型手掌，畀玩家還原呢一幕，重現呢位年少幹探嘅神采，作為RoboCop嘅忠實戲迷，相信唔會放過呢款咁少見嘅Murphy Figure，出手要快！

網址：www.hottoys.com.hk

facebook：www.facebook.com/hottoyssecretbase

微博：weibo.com/hottoyssecretbase

微信：HotToysHK

查詢：3722 3988（旺角彌敦道信和中心20樓Secret Base）

＊ 圖片所示仍屬產品原型，與最後完成品或有少許分別。