重炮系嘅MS，對唔少高達粉絲嚟講特別有吸引力，最深入民心嘅機種，就有Gundam GP02A、Gouf Custom及Full Armor ZZ Gundam等等，重炮傍身分外有霸氣，真係唔打得都睇得！如果你都係好此道者，最近上架有售嘅Robot魂海盜高達X-2（Crossbone Gundam X-2 Custom Full Action Version），又會唔會係你嗰杯茶呢？X-2本體高約12cm，隨盒嘅Buster Launcher就長達17cm，加埋詭異嘅黑色造型，喺高達族譜之中，顯得與別不同。

Robot魂（R-Number 170）XM-X2ex Crossbone Gundam X-2 Custom（Full Action Version） 建議零售價︰$449.9

Buster Launcher比主體仲要長5cm左右，雙手握持時分外有霸氣。

胸口嘅十字軍標誌用咗移印處理，夠晒清楚。

右邊圓盤形握柄可以前後移位，讓用家更易擺到射擊甫士。

正如同系嘅Gundam X-1，頭部組件備有正常及散熱兩款造型。

除咗Buster Launcher，隨盒就只剩一對激光劍做武器。

反派造型出晒面

全黑色嘅造型，喺高達世界中實在少見，皆因X-2喺《機動戰士海盜高達》嘅故事之中，屬於敵對勢力「木星帝國」嘅陣營，奸到出面都好合理。至於Robot魂嘅X-2，其黑色部分似有消光處理，望落的確少咗「膠」味，不過黃色位置嘅塗裝工夫尚有改善空間，似乎底色處理做得唔夠，所以黃色位置嘅遮蓋效果未算完美，而且小腿以至X形推進器嘅噴射口邊緣，塗裝效果未夠「實淨」，有輕微嘅出界問題。還好胸口中央嘅十字軍標誌用咗移印處理，清晰效果超出預期，總算喺造型方面挽回分數。

Buster Launcher拎得起

X-2高達嘅最大賣點，莫過於長距離高出力嘅Buster Launcher；但凡長炮型武器，即使喺漫畫以至動畫都畫得幾咁有型，但係化為玩具實物嘅話，往往出現難以握持嘅毛病，Robot魂X-2就叻在打破流弊。首先Buster Launcher嘅左、右兩邊都有唔同嘅握柄，左手握柄可以上下扳動，右邊就設計成圓盤狀，可以前後移位，換言之兩邊握柄都有「就位」能力，專為擺出雙手持炮嘅甫士而設。另一方面，X-2本體亦有唔錯嘅可動性，除咗手肘有雙關節、肩關節可以拉出，又有一定嘅扭腰幅度外，隨盒仲有專為圓盤握柄而設嘅造型手掌，令X-2可以更容易擺出雙手持炮嘅招牌甫士，加埋背部起晒角嘅X形推進器，夠晒台型，傳神展現一炮殲敵嘅霸氣Look！

查詢：2433 1828（瑞華行）