愈嚟愈多人會用手機、平板睇片，喺街就話方便，不過返到屋企始終都想用個大芒慢慢煲。咁Chromecast就幫到你，出自Google手筆嘅佢早前登陸香港Play Store，尺寸同一隻USB手指一樣，可以將手機嘅影片無線同步傳輸至大電視，即時由5吋迷你映畫變身做50吋影院，煲劇、睇戲從此爽得多！

Chromecast $349

附送HDMI延長線，電視HDMI插口唔就手都冇有怕。

同手機一樣設有microUSB作輸電之用，隨機亦附送火牛。

連接Chromecast後，指定Apps就會出現呢個無線播放圖示，一就會將手機上的內容射上大電視。

試把YouTube影片透過Chromecast於電視播放，電視播放時，手機會即時停止播放兼變做虛擬遙控，用法簡單直接。

安裝方法簡單，只需插入電視或屏幕HDMI插口，再駁microUSB供電就得。

配對設定簡單，對啱認證碼再確認就得。

支援Cast Screen功能，手機咩內容都可以投射到電視。

試用Cast Screen，測試版操作未算穩定，過程亦出現Lag機。

Chromecast用法簡單，只要將佢插落電視嘅HDMI插口，再用microUSB供電；之後用家就可以喺Android裝置、iOS裝置、Mac及PC上嘅Chrome瀏覽器或者Chrome OS之上安裝《Chromecast》或《Google Cast》插件，再根據指示，進行簡單設定，安裝過程就大致完成。

安裝不用5分鐘

小記試用Android手機進行測試，發現設定過程清晰明確，全程唔使5分鐘就搞掂。之後，只要Chromecast同手機都連接相同Wi-Fi網絡，每逢手機開啟指定應用程式，好似《YouTube》、《Google Play電影》等，播放時就會自動出現無線播放圖示，一就會射上大電視，播放仲好順暢添！不過要留意，暫時只有指定Apps支援串流播放，除咗上述兩隻外，其餘嘅《Netflix》、《Hulu Plus》、《WatchESPN》、《MLB Premium》等等喺香港都唔算普及。幸好，Chromecast亦同時支援Cast Screen功能，可以將手機畫面直接同步至電視，用法方便得多；不過此功能暫時仍屬測試階段，有明顯遲滯，希望正式版推出時會有所改善。有興趣購買的話，只要上Google香港Play Store就可以買到，免運費之餘，一至兩個工作天就會送到府上，唔使出街左撲右撲咁麻煩。

網址：www.google.com.hk/chromecast