Lumia 830鋁邊彩底有新意

近年手機界Android、iOS平分春色，而Windows Phone就發力狂追，定期都有新機撐場。最近抵港的，就是於9月初在德國IFA展覽發布的Lumia 830，話就話走中階路線，不過都備有PureView鏡頭、四核心處理器、4G制式等規格，最正就係預載最新的Windows Phone 8.1系統及Lumia Denim功能更新，一系列新功能齊備都只售三千幾元，絕對唔貴！

搭載5吋屏幕，不過解像度只得720p，輸蝕在細緻度。$3,598

搭載5吋屏幕，不過解像度只得720p，輸蝕在細緻度。$3,598採用可拆式電池，不過2,200mAh就唔多夠用。

支援《Live Folders》，可以將Apps以資料夾整理，而且亦可於資料夾內調校圖示大細。

改用nanoSIM細卡，用家可能要搵網絡商換卡。

機側連帶按鍵都用上鋁金屬物料，手感不俗。

備有1,000萬像素PureView鏡頭，成像有水準。

《Cortana》會透過Bing搜尋相關資料，查天氣當然冇問題。

內置地圖，定位功能亦相當準確。

《Xbox One SmartGlass》如配合Xbox One指定遊戲的話，便可以同手機連動。

照舊可以與用家Xbox帳戶同步，睇到成就等內容。

試相
室內暖色燈下拍攝，白平衡正確，蔬菜葉脈清晰可見，畫質細緻。

近年好多手機都唔再用塑膠物料，取而代之就係鋁金屬，手感好啲咁話。Lumia 830都一樣，用上鋁邊框設計，配合方角機身，感覺都算有型。而擰轉機背又有另一種感覺，皆因背蓋大玩顏色，提供橙、綠、白、黑四種配色，小記就最鍾意橙、綠兩色，Young好多喎！順帶一提，前三色機身邊框都係銀色，而黑色版本就特別用埋黑色鋁邊，想型格都有得揀。

PureView靚鏡

提起拍攝，Nokia代表作當然就係PureView鏡頭；以往只有高階或旗艦機採用，今次就連中階Lumia 830都有！這個1,000萬像素PureView鏡頭支援光學防手震，又獲蔡司光學認證；以《Nokia Camera》App拍攝，對焦以至測光都相當準確，影完再用電腦放大100%，四邊細位仍然清晰可見，雜訊亦可接受；唯一要彈就係鏡頭啟動時間有啲慢，廠方話遲些更新成《Lumia Camera 5.0》軟件後，啟動速度就會有改善。

操作流暢

Lumia 830搭載1.2GHz Qualcomm Snapdragon 400四核心處理器同埋1GB RAM，跟Android機比較，效能明顯較一般；但配合Windows Phone 8.1作業系統，實際撥頁、開Apps又幾流暢。順帶一提，此機支援4G Cat 4制式，下載速度可高達150Mbps。而系統更新又係另一賣點，換上最新版本的Lumia Denim，可以用到一系列新功能，好似《Live Folders》就可將主頁動態磚以資料夾整合；《OneDrive》增至15GB儲存空間。最特別就係語音助理《Cortana》，玩法同iPhone的Siri類似，用語音查詢天氣、地點等資訊，又可以叫佢幫你設定行事曆；小記試玩後，發現語音系統比Siri甚至Google Voice Search都更加準確，而且《Cortana》仲識得問你後續問題，用落都幾方便。惟要留意，暫時《Cortana》只支援英文及普通話，亦限定選擇指定地區，如果支援埋廣東話就更加正。