話題作對決Galaxy Note 4 vs iPhone 6 Plus

最近人人追iPhone 6 Plus，但有睇頭的大芒手機又豈只佢一部；同期登場的Samsung Note 4也勢均力敵！然而，問題又來了，兩部機雖然平台不同，但定位、價錢卻非常接近，除非閣下係「果農」，否則純用家來說都認真難揀！為幫大家解決以上問題，達人G就Set好三個擂台陣，睇吓邊部最適合你啦！

Galaxy Note 4 $6,298（a）

iPhone 6 Plus
$6,388（16GB）
$7,188（64GB）
$8,088（128GB）（b）

以AKB48比堅尼相片測試，Note 4（左）輸出光亮，對比度高，髮絲清晰易見；iPhone 6 Plus（右）膚色則偏向自然，長看會較舒服。

將Note 4左右擺動，就能拍出120度廣角相片。

iPhone 6 Plus夜拍對焦快、測光準，雜訊不多，表現跟白天同樣高質。

輕碰Home鍵兩下，即可把iPhone 6 Plus的畫面降至屏幕下半部。

虛擬QWERTY鍵盤間適中，配合剪貼等快捷鍵，打字比歷代iPhone都要好。

Note 4的S Pen靈敏度獲大幅提升，畫圖記事更快更準。

Note 4還加入了心跳感應器，既可測心跳，還可變成快門掣，一物二用！

第1回合：鬥屏幕質素：Galaxy Note 4 Win！

兩部手機屏幕只相差0.2吋，解像度則分別達到2,560×1,440及1,920×1,080，牌面上Note 4較為優勝。不過坦白講，除非閣下貼住個芒聞相，否則肉眼看細緻度相距不大。若硬要比較，Note 4支援90%以上Adobe RGB色域，顏色較鮮艷奪目，而且亮度較高，成幅畫咁靚！相反，iPhone 6 Plus顏色雖偏向自然，但略嫌陽光底下未夠清楚，而最重要是Note 4有2.5D玻璃保護，玩完幾日所見，耐磨防花能力的確好過對手喎！

第2回合：鬥拍攝能力：iPhone 6 Plus Win！

Note 4的1,600萬像素鏡頭好似勝過iPhone 6 Plus的800萬像素，不過玩開相機都知，像素高唔代表質素高。達人G將兩者的夜拍相片放喺電腦觀看，發現Note 4會自動推光相片，雖然較清晰，但雜訊亦同樣增加；反之iPhone 6 Plus偏向採用低ISO及較慢快門，所以雜訊、噪點較少，質素跟日光之下相差不遠！拍攝新功能方面，Note 4左右扭動手機就影到120度廣角自拍相，Selfie族必Like。只不過，iPhone 6 Plus追加了縮時攝影、預校拍攝及240FPS超慢動作等功能，好玩又別具新鮮感，所以達人G投佢一票！

第3回合：鬥操作系統：DRAW

Note系列當然有得玩S Pen觸控筆，今代壓力敏感度提升至2,048級，手寫、畫圖又快又準，最正係可如電腦Mouse般拖放文字及圖片，操作好比電腦咁靈活！iPhone 6 Plus厚度只有7.1mm，非常之薄，加上圓渾邊框不似得Note 4咁鎅手，個人認為更加好拎。另外，只需輕碰Home鍵兩下，iPhone 6 Plus的畫面即自動降至屏幕下半部，橫置時又懂得把畫面一分為二，所以鬥操作的話兩者實在難分高下！

達人G結論：煲劇影相各擅勝場

作為年度兩大機王，兩機表現非常接近，Note 4贏畫面細節，屏幕又稍大，鍾意煲劇可以揀佢。iPhone 6 Plus影相則較好，特別是夜拍，市面其他手機好難勝過它，加上玩法多變又具備新鮮感，拍友們一定Buy佢！若閣下既不煲劇又不影相的話，個人就認為iPhone 6 Plus系統相對簡單，適合新手；Note 4就較為複雜和進階，適合舊用戶升級使用啊！