要數依家最受香港人歡迎嘅英國劇集，睇怕《Sherlock》認第二都冇人敢認第一，不過講到最經典嘅，始終非《Mr. Bean》莫屬，唔只開埋電影版及卡通版，仲連Action Figure都玩埋一份，早前已經有本地品牌推出過1/6 Mr. Bean，結果一上架即被「秒殺」，如今Enterbay再接再厲，而且係Big Size嘅1/4版本，唔只變大咗，就連Package都有心思過人，各位豆迷就算要破財，都一定笑住冇投訴啦！

Enterbay HD Masterpiece 1/4 Mr. Bean（HD-1016）
售價：$2,888

見到呢張Mr. Bean機票，會否令你想翻睇《Mr. Bean's Holiday》？

兩款頭雕造型都由YJ擔任指導及塗裝，雕工出自SCUDERIA，由五官輪廓到神情都似到足，恍如Rowan Atkinson本人現身眼前。

腰帶有埋皮帶扣，而手肘又做足Patch Work剪裁，畀足誠意。

整套Boxset最過癮嘅配件，非「火雞頭」莫屬，想唔笑都幾難！

隨盒附有軚環一個，中央刻有MB字樣，EB遲啲會唔會出埋1/4嘅MINI呢？

隨盒附件唔算少，除咗有Mr. Bean Bear，仲有內褲、短褲及皮製行李篋。

包裝盒設計到成個行李篋咁款，相信玩家拆開後都唔捨得丟棄！

專用地台唔只有「Mr. Bean」字樣，表面仲設計成石板街模樣，夠晒入戲。

其實Rowan Atkinson仲有唔少抵死造型，包括喺2012年倫奧扮演鋼琴師，以及《Johnny English》嘅特務Look，EB不妨諗諗佢。

《Johnny English》特務Look

由1/6變成1/4，成隻Figure變大咗，細節度當然要有顯著提升，若然只係保留於1/6水平嘅話，原本某啲唔顯眼嘅瑕疵，放大喺1/4身上都會變得好礙眼，搞到弄巧反拙；今次EB就畀足心機，對主體上嘅每個細節都非常挑剔，而且附件又夠晒Gimmick，充分運用1/4變大咗嘅發揮空間，呢啲咪係誠意囉！

雙頭雕栩栩如生

到底EB有幾多誠意？淨係套西裝已經冇得輸，由用料到剪裁都似到足，簡單啲講，如果單憑相片，而事前又冇話你知係Figure服飾嘅話，你以為係真衫真褲都唔出奇，尤其是見到絨布西裝褸嘅手肘位有Patch Work剪裁，腰帶又用皮革製成，仲要做埋皮帶扣，西褲又熨到起晒骨，而皮鞋鞋面唔只有壓印花邊，最感動係鞋帶用幼繩串成，並非1/6常見嘅「啤膠」了事，美中不足是「皮鞋」以塑膠製成，質感始終不及真皮。

至於Action Figure嘅靈魂所在，自然係頭雕做工，EB 1/4 Mr. Bean就有兩款，分別係笑面Look及O嘴Look，兩者雕工準繩之餘，而且由於1/4嘅關係，令頭髮層次、瞳孔顏色及眼眶內嘅紅根、額頭與眼角嘅皺紋、面頰嘅法令紋，以至下巴嘅鬚根等細節，都有比1/6更清晰、細緻嘅演繹，尤其是面上嘅細痣，以往嘅1/6版本只能以塗裝表達，如今嘅EB 1/4仲可以雕埋出嚟，比起1/6更具立體感。

超搞笑火雞頭

附件方面，當然唔少得Mr. Bean至愛嘅Bear，不過老實講，呢隻Mr. Bean Bear嘅製作難度唔算高，即使神似亦未算驚喜，最頂癮係隨盒附上嘅「火雞頭」組件，傳神重演第七集《Merry Christmas, Mr. Bean》嘅搞笑情節，不過留意組裝起嚟頗為吃力，用家要花多少少手力及耐性了。除此之外，Boxset嘅兩個行李篋設計同樣出色，首先作為Figure道具嘅1/4行李篋，表面用皮革製成，質感當然勝過單純嘅塑膠製品，而且可以打開，放入Bear、短褲及內褲等附件；而整個Boxset嘅包裝盒亦設計成行李篋模樣，仲跟埋印咗Mr. Bean個樣嘅機票，設計團隊嘅心思認真抵讚，不期然令人想起2007年嘅《Mr. Bean's Holiday》。

網址：www.enterbay.com

facebook：www.facebook.com/enterbayofficial

查詢：2332 3615（旺角廣華街仁安大廈地下EB門市）