TalkBand B1手帶變耳機
Wearable智能裝置係今年科技界熱話，傳聞Apple嚟緊都會加入戰團。國產科技品牌華為（Huawei）當然都唔執輸，最近正式喺香港推出旗下首款佩戴式智能裝置TalkBand B1，最正係佢竟然可變身成藍芽耳機，真係估佢唔到。
主畫面顯示藍芽連接狀況、時間及電量；手帶、機芯可分拆使用。$1,080
手腕唔夠粗的話，戴上手有少少鬆。手帶厚0.3mm，可隨意沖洗，目前有黑、藍兩色。
手帶尾部內藏USB端子，充滿電可連續使用六日及通話七小時；如關上藍芽可待機達兩周。
《Huawei TalkBand》程式支援Android 4.0及iOS 5.0，可記錄一日、一周或一個月嘅健康數據。
只要輕按機芯側的按鍵，即可轉換顯示內容，包括計步、燃燒卡路里、睡眠時間。當來電時，機芯就會震動，屏幕亦會顯示來電者資料。
無篤芒版Gear Fit
驟眼睇TalkBand B1條橡膠手帶及窄身弧形屏幕都有幾分似Samsung Gear Fit。雖然B1唔似得Gear Fit可以篤芒兼量心跳，不過一樣內置感應器，可以計算步行步數、燃燒卡路里甚至睡眠質素等資料。用家除可透過機面嘅1.4吋OLED屏幕睇番健康數據外，亦可將資料與《Huawei TalkBand》手機程式同步。當手機有來電時，B1屏幕會顯示來電者資料以及震動提示，唔怕錯過來電。
分拆變藍芽免提
話明叫TalkBand，又豈止來電提示咁簡單；只要輕按手帶解鎖扣，機芯就會自動彈出，原來錶芯係藍芽耳機！手帶凹槽同機芯底部均設有金屬接點，當耳機塞落手錶凹槽，就會如常記錄健康數據；如果機芯離開手帶的話，就會啟動免提功能。耳機內建雙咪高峰，可減少背景雜音，通話清晰。順帶一提，TalkBand B1支援IP57防水防塵標準，濕水都冇問題。
查詢：3791 2856
