HT 1/6 Batman踩入電玩界

Batman一向係1/6 Action Figure嘅大熱角色，不過出咗咁多年，都係以電影版造型為主，就算頭雕有幾似，新鮮感都大不如前。其實Batman嘅舞台又點只大銀幕或漫畫書？佢嘅電玩作品同樣受歡迎，Hot Toys最近就攞到人氣電玩《Batman：Arkham City》嘅Figure製作版權，Batman忠粉唔使再靠Controller，可以實實在在控制Batman嘅一舉一動了。

HT VGM18 《Batman:Arkham City》1/6 Batman
零售價︰$1,430
預訂價︰$1,390

《Batman Arkham City》是近年動作電玩嘅經典之一，集動作、解謎及高難度Boss等元素於一身。

Figure高約31cm，全身可動關節就有30個之多。

雖然頭雕露肉地方唔多，不過紋理、膚色、嘴唇及蝦餃下巴都相當到位，CG造型都成個真人咁款。

咬牙切齒表情一臉怒氣，頗有漫畫Feel。

採用包膠Body製成，一排朱古力腹肌完美晒冷，留意腰間仲有多功能腰帶。

深灰色長靴以塑膠打造，雕工方面做足層次感。

基本上電玩中用過嘅武器，HT版本都一一落齊，最有代表性嘅當然係Batman飛鏢。

有錢嘅富二代，呢個世界有好多，不過大多數花天酒地包小三小四，好似Bruce Wayne咁挖個蝙蝠洞、着埋緊身衣，神神秘秘伸張正義嘅有錢仔，可謂絕無僅有；正正因為佢咁超現實，面世已有75年嘅Batman依然大受愛戴。為咗慶祝呢個大日子，HT特別取得電玩《Batman Arkham City》嘅Figure製作版權，後者集合動作、解謎及大量支線任務等好玩元素於一身，被譽為近年最佳嘅動作遊戲之一，加上HT首度「演繹」遊戲中嘅黑暗騎士，即時令「Batman Figure」呢個主題有番新鮮感。

角色依舊　造型有別

跟以往嘅Batman Figure有Christian Bale或Michael Keaton等真人演員做參考唔同，由於今次嘅遊戲角色完全由CG設計而成，製作難度超高，韓國頭雕師Jimo Lee加埋首席塗裝師JC. Hong，都要多次參考遊戲畫面及過場動畫，先至準確拿捏到表情神髓。就以官圖所見，不枉兩位大師金睛火眼，細膩表達出有如真人嘅皮膚紋理及面部輪廓，而且為咗提升玩味，隨盒附有正常及咬牙切齒兩款臉部組件，個人認為以後者最神似，甚至帶點Sideshow Premium Format嘅漫畫感覺，同以往HT出過嘅Batman Figure有顯著分別。

包膠谷肌　擺甫就位

素體方面，由於Game中嘅Batman擁有一身爆肌Look，為此HT特別選用包膠Body製作，再以搪膠做出復古Look嘅Batman戰衣，粗獷感覺與以往大賣線條美嘅Batman Figure相比，完全唔同晒。不過包膠Body有辣有唔辣，筆者估計為咗遷就關節嘅活動空間，令到搪膠戰衣未夠貼身，令外觀有啲肥腫難分，舉手仲有虛位出現，影響整體觀感，期待大貨正式推出前會作出改善。至於附件方面，Batman出名多「架生」，所以有齊繩索發射器、蝙蝠飛鏢、蝙蝠鈎爪連可替換箭頭、爆炸凝膠噴霧器及九款造型手掌，忠粉應該收貨啦！