影相拍片一篤變大師
唔少人都習慣用手機影相兼後製，整到靚一靚先Share到社交網站。不過，如果想博取更多Like，總要下工夫，除了相片構圖要再靚啲之外，亦要有幾隻別出心裁的影相和拍片Apps，有啲甚至幫你改頭換面都仲得呀！
《Spring》增高即變九頭身
能夠選擇兩條或三條基準線，以對準身體各部分。
可見製作前後的分別，立即高人一等。
《Perfect 365》虛擬化妝
程式會偵測用家的輪廓和眼耳口鼻。
可選擇時下最熱門妝容，改變眼妝、唇色、髮色等。
《Mirror Photo》鏡像疊影
能夠如鏡子般左右或上下反射，營造與別不同的效果。
內建60多種相框，為相片點綴一番。
《FotoRus》大玩效果
畫中畫效果有多款主題選擇，如玻璃瓶、放大鏡、相機等，令相片更有Mood。
具備超過300款拼貼Layout，大玩雜誌風格。
《美拍》自製韓式MV
能夠攝錄十秒短片，並以背光、高對比呈現，大玩韓式MV風格。
影片可以Share到社交網站予朋友欣賞。
《Magic Effects Studio Camera》加插天象奇觀
後製時可加上日食、月食、流星等各種天文效果，當然要準備一張靚靚風景相。
程式能夠調校色調、玩清晰或模糊，甚至加字都得，玩法相當多。
《Spring》增高即變九頭身
近期哈薩克排球女將大熱，她那身型比例惹人羨慕。如果你都想擁有完美身段，其實可以好簡單，只要下載《Spring》應用程式，就能夠幫你好似彈弓咁拉長身體，還可以選擇實時拍攝或載入相片。使用程式拍攝前可選擇兩條或三條基準線，就以三條基準線為例，是用作對齊肩膀、臀部和腳踝，拍攝時只要將三條線分別對齊主體，再按下方的彈弓狀拍攝鍵，立即幫你增長，想要九頭身、42吋長腿、黃金比例都絕無難度。
INFO
平台：iOS、Android
下載費用：免費
《Perfect 365》虛擬化妝
唔少女士拍攝前都會先補妝，更甚的是每朝瞓醒都會先化妝後拍攝，再話畀大家知剛剛起身！其實只要下載《Perfect 365》App就唔使咁費時，大家只要準備一張素顏，就可以試盡入面的虛擬化妝。事關App會偵測用家的眼耳口鼻，認清楚個樣，即可選擇需要的熱門妝容，有齊眼妝、唇色、髮色等畀你試妝，而且支援美顏功能，磨皮、祛斑、美白、亮齒等等都做得到。
INFO
平台：iOS、Android
下載費用：免費
《Mirror Photo》鏡像疊影
自拍照來來去去都係一個人，覺得孤獨的話不如搵多幾個「自己」相陪！情節咁科幻？使用《Mirror Photo》應用程式就得，其最大特色是能夠把相片好似鏡子一樣反射出多個影像，要一個變兩個，甚至四個都無問題，人像就會左右、上、下好似倒映咁展現出來；加上內置30種濾鏡特效以及60多種框架，讓你為相片加添效果和修飾，玩出不一樣的作品。
INFO
平台：Android
下載費用：免費
《FotoRus》大玩效果
雖然坊間上有唔少後製和修圖App，不過大部分都只係加濾鏡效果和調校色彩。接着介紹的《FotoRus》玩法就更加多變化，不但擁有300多款相片拼貼Layout，讓多張相片以雜誌風格形式呈現，還具備有趣畫中畫模式，讓你的相片加入不同的場景，而且有200多種特效。此外，還有高清美化修飾肌膚，甚至能夠加入20多種場景模式、50款濾鏡等，最重要是無損美化功能。
INFO
平台：iOS、Android
下載費用：免費
《美拍》自製韓式MV
假如你玩手機拍攝已經登峰造極，又覺得冇咩好玩，不如試吓拍片，要拍出唯美的影片其實唔難，事關美圖秀秀推出的《美拍》App，能夠讓你拍出十秒短片，玩法有點像Instagram。《美拍》亦好似美圖秀秀一樣，具備幾十款獨特濾鏡效果，要變出不同的風格一Click搞掂，韓式、懷舊風由你話事，再加上內置智能剪輯功能，唔識剪片都一樣搞得掂，配合內置的各式的配樂，讓你一手自製精彩短片。
INFO
平台：iOS、Android
下載費用：免費
《Magic Effects Studio Camera》加插天象奇觀
現時手機咁方便，想要一張讓人滿意的作品，已經變得不費吹灰之力，只要用App後製就得到，如果想玩得再Pro，主打後期製作的《Magic Effects Studio Camera》就能夠創作出影樓風格的作品。應用程式最特別的地方是可以為相片加入各種天文現象，例如日食、月食、流星等，令一張平平無奇的風景相變得有趣。惟要注意，間中使用都還可以，經常用就變得無驚喜，畢竟這類天文現象並非時常見到。
INFO
平台：Android
下載費用：免費
