北京直擊：小米4精製鋼框

雖然小米科技向來予人「山寨王」感覺，但旗下手機、盒子、電池、電視卻往往全城瘋搶，原因無他，性價比超高是也！在接下來的月尾，「米粉」再次好唔得閒，事關首席執行官雷軍剛於前天發布全新「小米手機4」，把不銹鋼邊框、木紋背蓋及高階規格融為一體，卻只賣1,999人仔！新機最快7月29日於內地見街，香港則未有確實推出日期，想買惟有吼住聯通水貨版了！

發布會由「雷布斯」雷軍主持，一身黑Tee配牛仔褲打扮，真有幾分教主影子。

小米手機4採用了不銹鋼邊框，大會仲每人送一塊鋼板樣本畀大家留為紀念。

小米4（左）跟小米3（右）同用5吋芒，但機身卻小巧得多，圓渾機角亦有助提升手感。

提供木紋及大理石等背蓋選擇，感覺好Raw！

僅厚8.9mm，比直立的microSD卡還要薄一半。留意機頂設有3.5mm介面及紅外線感應器。

屏幕顏色自然，細緻度又夠高，圖中花瓣連紋理出晒嚟！

前置鏡頭追加了三秒倒數時計，自拍更方便。

另設動態追焦功能，對焦框大細可隨意選擇。

手機可變身遙控器，最多支援2,853款設備。

Benchmark僅得34,138分，唔算標青，但仍比小米3優勝。

提供「小米黃頁」，把常用電話分類，設計貼心。

會場花絮
場內特設媒體體驗區，但每次只得十分鐘試玩。

「米粉」從全國各地而來，部分更搖旗吶喊，勁投入！

One More Thing─小米手環

邊框製作優良

若有留意小米新聞的話，都知道小米很有Apple的「影子」，今次北京發布會由宣傳到Keynotes都極像WWDC，果迷一定鬧爆對方「山寨」，但小米好賣卻是鐵一般的事實。雷軍表示，單是今年上半年小米已賣出2,611萬部手機，而今年目標更定在6,000萬部，要達成這個藍圖，小米4肩負重任。現場睇實物，新機最大亮點係不銹鋼邊框，以鍛壓技術製作，並經過193個工序、32小時精雕細琢而成，最後再加入防指紋塗層，難怪摸起來毫不刮手，又不沾指模，手工極佳。要讚的還有背蓋，除傳統黑白外，日後還有木紋、皮革、仿皮及大理石紋等選擇，與邊框大玩Mix & Match，襯衫一流！

屏幕逼真柔和

小米電視以4K芒帶起話題，雖然小米4沒有如傳聞般用上2K芒，但5吋屏幕依然提供1,920×1,080解像度，像素密度達441ppi之餘，NTSC色域更高達84%，比iPhone 5s高出17%！試玩所見，屏幕顏色逼真得來也柔和，而且亮度適中，長睇都唔刺眼，用戶可放心打機煲劇。鏡頭方面，1,300萬像素唔算標青，不過雷軍指女士是他們的重要客戶，所以今代加入了不少簡單拍攝功能，例如前置鏡頭的「3秒倒數自拍」，以及後置鏡頭的「動態追焦」及「先拍照後對焦」技術，加上HDR、4K錄影、36級美顏及15款實時濾鏡，保證影相初哥都變大師傅。

7月29日先賣聯通版

實測性能，以Snapdragon 801 2.5GHz四核心處理器及3GB RAM推動的小米4，開Apps、撥頁、打機都十分流暢，長玩亦唔熱，散熱工夫不俗。惟不知是否工程樣本關係，《AnTuTu》跑分只有34,138，只微勝小米3少許，單看數字唔算有好大驚喜。至於售價，小米產品向來以平價作招徠，小米4雖未算超低價，但16GB版及64GB版分別只售1,999及2,499人民幣，依然甚具吸引力，再每年若加99人仔，更可獲爆芒及意外入水保障。小米指7月29日會先推聯通版，8月再推中國電信版，9月則有中國移動4G版本，而香港行到的FDD-LTE版則最快年底面世。