昨天先過咗大暑，氣溫真係熱到人都癲，LEGO HK一於「逆天而行」，將明日開始嘅電玩動漫節變成冰天雪地？筆者所講嘅係LEGO「極地探秘」展覽館，佔地180平方米嘅大型攤位，唔只布置成冰屋咁款，仲會展出由本地嘅LEGO Builder精心炮製嘅雪地動物模型，透心涼又夠Cute之餘，最重要係向入場參觀嘅一家大細傳達保育訊息，拯救雪地靠晒我哋！

明日開幕嘅LEGO「極地探秘」展覽館，內有逾20種由LEGO Brick製作而成嘅雪地動物，全部由本地嘅LEGO Builder自行創作。

場內仲有呢對珍寶級LEGO人仔，穿上愛斯基摩人嘅傳統服飾。

大會邀請了日本嘅LEGO Builder日高雅夫來港，擔任「趣味香港」嘅比賽評審，日高老師特別鍾意以音樂作為創作主題，唔知到時佢會帶幾多件自行製作嘅LEGO樂器到場畀大家開眼界呢？

精選必搶Items
聖誕節精品

人仔匙扣

Architecture The Eiffel Tower（21019）

萬聖節精品

本地創作極地動物

每次LEGO喺動漫節擺Show，都有非常鮮明嘅主題，今屆嘅「極地探秘」就以南、北極嘅生態為背景，將成個場館設計成冰屋咁款，仲會擺出逾20種由本地LEGO Builder自行創作嘅雪地動物模型，當中包括出自Schneider Cheung之手嘅雪鴞（Snowy Owl）、北極兔（Arctic Hare）和北極狐（Arctic Fox），形態極為神似，而且相當有「分量」，就以北極狐為例，就用咗接近10,000件LEGO積木砌成，令人大開眼界之餘，更希望向大家傳達環保訊息︰如果你都想北極狐等極地動物未來仍然可安居極地，而唔係剩番件模型畀大家憑弔嘅話，從今日起大家就要努力減排了！

入場觀摩記得投票

除咗「極地探秘」主題展覽，場內仲會展出「LEGO建築師大賽—趣味香港」嘅14件入圍作品，統統均以本地嘅著名景點或節慶活動為題材，例如天后寶誕舞龍大會，以及蘭桂坊與和昌大押等特色地標等，LEGO粉絲入場觀摩之餘，記緊於明日至本月29日期間仲可以即場投票，選出心目中嘅至佳作品，29日嘅下午3點45分起就會進行頒獎禮，LEGO HK仲專訪邀請咗日本嘅LEGO Builder日高雅夫到港做評審及頒獎嘉賓，唔知日高老師到時會帶幾多件個人作品，畀香港粉絲開眼界呢？做展覽、搞比賽之餘，當然唔少得有精選Items開售，除咗主流Boxset之餘，仲有唔少生活化嘅LEGO精品，包括匙扣、首飾盒、文具及小型場景等，加上Brick Corner亦準備咗逾500款唔同設計嘅LEGO Brick畀粉絲自由選購材料，LEGO迷入場前要有銀包大出血嘅心理準備喔！

攤位號碼：B03

facebook專頁︰www.facebook.com/LEGOHongKong