熱辣雙卡外遊抵玩
又到暑假旅行旺季，係咪已經訂好機票、酒店整裝待發呢？無論你喺香港用緊咩手機，出門旅行，識得用，一定用雙卡機；皆因可以同時插香港同埋當地SIM，玩飛線又得，喺外地上網又夠抵，既方便，又快捷。咁啱今期坊間有唔少雙卡機新鮮滾熱辣登場，梗係要出發前做足準備，玩得開心至醒係你！
搭載5吋屏幕，解像度亦達720p，顯示效果唔錯。 $2,098（a）
前置200萬像素鏡頭可以拍攝720p短片。
冇咗近期HTC機必有嘅BoomSound雙前置喇叭，喇叭設於機背位，聲效只屬一般。
一大一細卡槽，換卡零舍方便。
機背設有800萬像素鏡頭，亦支援全景及美顏等功能。
雖然未有內置HTC Sense，不過就保留咗BlinkFeed頁面，似足一個新聞中心。
搭載MediaTek八核心處理器，行Benchmark都有超過20,000分，效能合格。
Zoe Highlights可以將相片、影片自動加入特效和聲效串連成一段短片，話咁易就整到條短片。
其餘介面同一般公版Android冇分別，撥號前可以拉下狀態欄更換主卡。
主頁玩方格設計，似足Windows Phone。 $1,698（b）
機身備有黑、白、黃、綠四色，其中以綠色最搶眼，感覺好Young。
一般Android手機機面都會備有返回、主頁等按鍵，但Nokia XL只得返回鍵，長按就會彈回主頁。
支援雙卡雙待功能，其中只有SIM 1兼容3G網絡。
雖然冇Google Play，不過都有《Nokia Store》可以下載Apps。
Fastlane頁面會將近期用過嘅Apps同埋訊息提示順序列出，清晰易睇。
內置《HERE Maps》，定位、導航、下載離線地圖都可以靠佢。
5.5吋IPS屏幕可視角夠高，同身邊人齊齊睇片都好清楚。 $1,699（c）
SIM 1支援4G網絡，亦兼容雙通功能。
機背採用塑膠物料，表面有細紋，夠啜手。
支援4G制式，測試下載速度時，錄得逾22Mbps，合格！
備有「C鍵」，將開關、Home、返回等功能鍵變為虛擬鍵，仲可以隨時換位，操作更方便。
「智能多屏」可以把程式一上一下於畫面顯示，不過僅可以選擇電郵、影片等指定程式。
Ben
1st Choice：HTC Desire 616 Dual SIM貼心雙卡槽
HTC近期推出多部Desire系列嘅中階機，好似Desire 816、610、310等等，最近又有部新作Desire 616 Dual SIM。一睇型號，唔使問阿貴都知佢支援雙卡雙待功能；首先要讚就係SIM 1卡槽用標準大卡，而SIM 2就係依家常見嘅microSIM，有齊兩款卡槽，喺外地買SIM唔使特登剪卡，用法夠靈活。另外，此機雖然只兼容「單通」，不過就特別內置「自動轉接」功能，當SIM 1或SIM 2通話時，就會幫你自動將號碼飛線，保證唔會錯失任何Call。
精簡Android系統
自從加入Android陣營之後，HTC幾乎每一部手機會預載自家嘅HTC Sense介面，介面靚之餘，仲有唔少好用小功能；不過此機竟然將Sense介面抽走，取而代之就係近乎公版嘅Android介面。雖然冇咗HTC Sense，不過就特意保留咗HTC BlinkFeed動態首頁及Zoe Highlights兩個招牌功能，前者可用方格形式一頁顯示不同新聞、社交網絡消息；後者就可以將相片、影片串連並加入音效、濾鏡製作成微電影，實用兼好玩。值得一提，採用公版Android後系統更精簡，配合MediaTek 1.2GHz八核心處理器及1GB RAM，整體操作相當流暢。
SPEC
制式：GSM四頻、WCDMA（雙卡雙待）
處理器：MediaTek MT6592 1.4GHz八核心
記憶體：1GB RAM、4GB ROM，支援microSD
屏幕：5吋（1,280×720解像度）
鏡頭：後置800萬像素、前置200萬像素
對外連接：藍芽、Wi-Fi、microUSB、HSPA+ 21Mbps
電池容量：2,000mAh
作業系統：Android 4.4.2
體積：142×71.9×9.15mm
重量：150g
2nd Choice：Nokia XL 兼容Android Apps
依家幾乎所有廠商都會推出Android手機，而Nokia講足幾年，其Android手機終於登場，佢就係Nokia XL。此機驟眼睇其實都幾似同廠嘅Lumia手機，不過最正就係改用由Android改版而成嘅Nokia X系統，雖然冇預載Google Play，不過都全面支援Android Apps，用家可以透過自家嘅《Nokia Store》、第三方嘅《1mobile market》又或者自己搵apk裝Apps，小記試過Facebook、WhatsApp甚至大熱遊戲《2048》都玩到，絕對唔使擔心兼容問題。
預載地圖軟件
廠方特意將原有的Android常見嘅主頁、功能統統抽走，換上類近Windows Phone 嘅彩色格仔頁面，用家仲可以將格仔移位、縮放又或者換色；另外，仲加入「Fastlane」頁面，於主頁向左或向右掃就會彈出，頁面會順序列出好似撥號、來電等提示訊息以及好似上網、相片等最近使用過嘅Apps，方便用嚟切換程式及其他功能，用落都算就手。功能方面，此機備有5吋屏幕及1GHz雙核心處理器，規格一般。不得不提就係支援雙卡雙待功能之餘，仲預載Nokia招牌嘅《HERE Maps》，支援定位，亦可以玩導航兼下載離線本地及外國地圖，外遊Shopping搵路抑或自駕遊都大派用場。
SPEC
制式：GSM、WCDMA（雙卡雙待）
處理器: Qualcomm Snapdragon S4 Play 1GHz雙核心
記憶體：768MB RAM、4GB ROM，支援microSD
屏幕：5吋（800×480解像度）
鏡頭：後置500萬像素、前置200萬像素
對外連接：藍芽、Wi-Fi、microUSB、HSDPA
電池：2,000mAh
作業系統：Nokia X（Android）
體積：141.35×77.72×10.87mm
重量：190g
3rd Choice：Coolpad K1對應4G網絡
一般雙卡手機頂多支援3G網絡，喺4G網絡咁發達嘅香港梗係嫌唔夠用。咁國產嘅Coolpad K1應該啱心水，因為佢係首部支援香港4G網絡嘅雙卡手機，其SIM 2僅支援2G制式，至於SIM 1卡槽就可以用到3G及4G網絡，喺香港、日本、內地都隨時可以4G上網。要留意此機僅兼容1,800MHz及2,100MHz FDD-LTE網絡，換言之僅行到香港常用嘅1,800MHz頻譜，而2,600MHz部分就行唔到，速度難免打折扣。
自家介面操作順
至於規格方面，此機走入門路線，採用Qualcomm Snapdragon 400 1.2GHz四核處理器及1GB RAM，一般貨仔；但配合自家介面下，操作、換頁效果都好順暢。此外，K1亦備有5.5吋屏幕，雖然解像度只有960×540，不過就用上IPS素材，顯示顏色準確，可視角亦相當高，等車、搭飛機時候煲劇就啱晒！順帶一提，廠商仲幫此機換上自家介面，圖示、Widgets都重新設計，而且仲有唔少新功能，包括「C鍵」及「智能多屏」，前者可以將開關、Home、返回等功能鍵變為虛擬鍵；後者則可以將電郵、影片等程式一分為二於畫面上顯示，玩Multi-tasking一流。
SPEC
制式：GSM、WCDMA、LTE（雙卡雙待）
處理器: Qualcomm Snapdragon 400 1.2GHz四核心
記憶體：1GB RAM、4GB ROM，支援 microSD
屏幕：5.5吋（960×540解像度）
鏡頭：後置800萬像素、前置200萬像素
對外連接：藍芽、Wi-Fi、microUSB、HSPA+
電池：2500mAH
作業系統：Android 4.3
體積：153.3×77.7×8.1mm
重量：170g
達人有Say
旗下有售多個雙卡手機品牌嘅代理商Pengbo（鵬勃電子科技）店長Ben提醒大家：「雙卡雙待手機一般會分為單通和雙通，如果手機淨係支援單通的話，SIM 1通話時，SIM 2號碼就會唔通；而雙通喺SIM 1通話時，SIM 2有來電都可以繼續接聽，用家可以視乎需要選購。」他提醒大家：「另外要留意手機版本，因為愈來愈多店舖喺大陸入貨，但內地手機制式主要分為聯通版及移動版，前者行WCDMA制式，同香港3G網絡相同；後者則採用TD-SCDMA制式，同香港制式唔同，嚟到香港淨係用到2G，千祁咪買錯！」
查詢：（a）3077 5588、（b）2136 6338、（c）2717 8131
