《幪面超人鎧武》將拉打與生果Crossover，姑勿論你Buy唔Buy，起碼勝在夠出位，喺特攝界成功做到唔少Noise，相信唔少粉絲都會抱住同樣嘅心態追劇︰下一集又有邊款生果變拉打呢？至於喺商品界類別，SHF早前出咗第一及第二男主角鎧武（橙）及巴隆（香蕉）後，第三款角色就輪到蜜瓜化身嘅斬月登場。

SHF Kamen Rider Zangetsu Melon Arms 建議零售價︰$389.9

變身器上刀形裝置可以上下移位，留意定鎖種子好易甩出嚟，把玩時要提高警覺。

肩甲雖然大大件，不過內有關節，可以向上移位，令斬月仍可自然地擺出各種攻擊甫士。

青色位置唔只有金屬色塗裝，最抵讚係模仿蜜瓜表皮嘅細紋，夠晒質感。

SHF拉打嘅面相做工一向高水準，斬月亦都冇甩拖，粉絲冇理由唔收貨吖！

防盾附有兩款握柄，方便擺出唔同嘅舉盾甫士。

大腿上嘅黑色紋理，並非行貨印落去，而係做咗凸紋處理，增加立體感。

瓜皮上身夠入戲

雖然斬月係由蜜瓜變身而成，不過戲服造型並非完全「青BB」，而係白色為主、青色為輔，再加啲金色點綴，同鎧武一樣大玩日本武士Look。SHF斬月最抵讚嘅地方，係造型上嘅青色位置，塗裝方面用咗金屬色之餘，表面仲有好多細紋雕刻，似足蜜瓜嘅表皮特徵，夠晒入戲。除此之外，前臂及大腿仿魚鱗甲嘅花紋用咗凸紋處理，並非求其印落去算數，如果隻隻SHF拉打都好似斬月咁做足功夫，相信大家都會少啲投訴。

防盾做工高水準

武器方面就有兩款，分別係無雙軍刀（Musou Saber）及蜜瓜防盾（Melon Defender），前者同鎧武所用嘅一樣，本報之前都介紹過，在此不贅了。後者就有兩大賣點，首先係塗裝以至雕工上都十分仔細，筆者真係搵唔到瑕疵挑剔，強行要雞蛋裏挑骨頭嘅話，就係紅色位置如果改用透明件嘅話，就會多一份晶瑩感覺；除此之外，防盾嘅握柄設有橫、直兩款可作更換，擺甫士時就有更多變化。美中不足係SHF鎧武及巴隆都存在嘅問題，斬月亦都一脈相承，就係腰帶上嘅定鎖種子（Lock Seed）好易鬆脫，Size又咁細粒，玩家要小心丟失！

ISHIMORI PRODUCTION INC. and TOEI COMPANY, LTD.

查詢：2433 1828（瑞華行）