烚得清潤杏汁白肺做湯底

香港人對火鍋的熱愛，並不會因為炎熱天氣而卻步。為了精益求精，不少火鍋店都推陳出新吸引客人，位於太子的嘉旺火鍋菜館，今個夏天就特別設計了多款火鍋湯底，其中杏汁白肺，清甜滋潤又消暑，加上新推出的傳統順德料理，變化多端，難怪大家大熱天時也愛打邊爐。

杏汁濃湯白肺鍋 $78
豬肺洗淨後蒸腍，加生磨杏汁、雞腳、豬軟骨、菜乾及大白菜等煲3小時以上，清甜無比，最啱用來烚肥牛。

為慶祝周年紀念，由即日起至9月30日，客人可以$1享用原價$68的冬瓜豬骨鍋。

四寶丸 $65
即日鮮製，包括牛肉鵝肝丸、墨魚流沙丸、芝士蝦丸和墨魚蟹籽丸。

頂級本地鮮肥牛大$298、細$218
脂肪分布均勻，特別加入洋葱粒以去除膻味，入口軟滑腍身。

刺身拼盤 $288
視乎當造食材而定，有澳洲帶子、挪威三文魚、醋鯖魚、北寄貝、大連鮑魚仔等，兼送日本清洒2支。

順德煎釀尖椒 $68
加入芫荽的手打鯪魚肉釀入尖椒內煎香，沾上用豉油和魚露等調味的醬汁，鮮味無比。

招牌滋味骨煲 $78
腩排用蒜、乾葱等5、6種食材醃個多小時後，加蛋漿和生粉脆炸，淋上秘製燒汁吃，酸甜惹味。

醬料中有特製的人手刨炸薑絲，香口微嗆，配搭任何食材皆可。

為讓客人吃到新鮮刺身，店內特設大魚缸放置海產。

樓上的兩間VIP房可打通，方便客人包場開Party。

嘉旺火鍋菜館

平常的火鍋湯底，離不開沙嗲、麻辣，又或是番茄豬骨、胡椒豬肚、醉雞鍋等，嘉旺的老闆謝先生和大廚龍哥就巧花心思，設計出不同的湯底，包括清新的蘋果雪梨豬骨煲、足料的胡椒豬肚雞煲等，而講到清潤之選，一定非杏汁濃湯白肺鍋莫屬，奶白湯汁杏香四溢，烚烚吓之前，不妨先喝一碗，清心潤肺一下；至於以牛坑腩熬製的番茄牛粒鍋，就最啱牛魔王腸胃，兩者都是筆者的心水推介。

$1冬瓜豬骨鍋

有靚湯底自然要有靚料作配搭，油花均勻的本地新鮮肥牛、每日鮮製餃類，還有餡料夠晒特別的丸類，如牛肉鵝肝丸、墨魚流沙丸、墨魚蟹籽丸等鮮美無比。另外，店內又供應生蠔和刺身，其中法國生蠔隻隻肥美新鮮，每次只返少量貨，以保持質素。至於勁抵食的刺身拼盤，有齊澳洲帶子、挪威三文魚、醋鯖魚、北寄貝等7、8種選擇，邊吃邊喝清酒，就最滋味。小菜方面，主打順德傳統菜，如順德煎釀尖椒、大良煎藕餅和大良炒鮮奶等，加上自創的招牌滋味骨煲，以及用秘製醬汁爆炒成的嘉旺小炒皇，夠鑊氣，配啤酒就最夾。值得一提的，是店子為慶祝周年紀念，特別推出$1享用冬瓜豬骨鍋，或於9時後入座，客人可免費享用爽口大連鮑魚一隻或鱆紅魚刺身，識食就要揀啱時段食。