飛天遁地！Parrot Rolling Spider
在接下來的8月，若在家中聽到飛機引擎聲，兼有一道黑影在牆上時，請不要驚訝，這裏沒有戰爭發生，只係你個仔在玩緊Parrot全新藍芽無人機Rolling Spider。做阿媽嘅咪鬧住，因為這飛機絕非小孩玩意，而且仲可以做出俯衝、懸浮、反轉、爬牆等高難度動作，操作技巧一啲都唔低。阿仔玩得叻，仲可以幫你拍下家中情況添！
你咪使旨意逃出我手指罅！（設計對白）
可沿牆爬行，但難度頗高，專家都要試幾次先成功。
Rolling Spider由聚酰胺機身及碳纖維車轆組成，既輕身又堅硬。 $788
Rolling Spider機底鏡頭除可影相，還可保持飛行穩定。
隨機附送表情貼紙，玩家可按喜好替換機頭樣貌。
Rolling Spider及Jumping Sumo皆採用550mAh可拆式電池，續航時間分別是8分鐘及20分鐘。
懸浮飛行唔難，但專家指若想玩得好，建議避開出風口，並在廣闊空間玩。
提供大量虛擬按鍵，一按就能做出各式動作。
《FreeFlight 3》可限制Rolling Spider的飛行高度及最大仰角。
Jumping Sumo有前置鏡頭，可拍攝前方景物。
Jumping Sumo機背設彈弓，輕鬆就可跳上高台。
Jumping Sumo兩個車轆可以伸縮，伸長可增加抓地力，縮短則提升速度。 $1,238
高深技術絕非玩具
遙控飛機豐儉由人，貴嘅廿幾三十萬一隻，平嘅幾百蚊就有交易。Parrot Rolling Spider屬於後者，但不要以為它只屬玩具層次，皆因其技術高深得很，例如內置三軸加速計及三軸陀螺儀，懂分析每一個動作及傾斜度；又有自動駕駛儀修正飛行姿勢；最巴閉係機身設有鏡頭，既可快拍，仲可以每隔16微秒把影像進行對比，以維持飛行穩定。專家更指，機身螺旋槳設壓力應器，一碰硬物，引擎即停，加上全機重量僅有55g，難怪撞到都唔痛！
透過手機App控制
講番玩法，其實好簡單，只要開啟藍芽，並透過專用《FreeFlight 3》手機App，即能控制它飛到4米咁高，並做出轉彎、懸浮、橫滾、翻觔斗等高難度花式動作；若駁上大車轆，更可沿牆爬行，成隻蜘蛛咁。記者會上專家邊玩邊解說，個個睇到「嘩嘩」聲，殊不知親自落場卻產生極大挫敗感，因為控制難度絕對不低，飛上天不難，但飛機頗易受冷氣等氣流影響，而且程式未算100%完成，稍一不慎即「墜機」收場。然而，咁難玩正好挑起男人的征服欲，而且廠方話上市前會解決程式問題，大家可以放心挑戰。
遙控車飛過80cm
嫌飛機難度太高，同場有操作較簡單的越野遙控車Jumping Sumo，改由Wi-Fi控制，透過程式便能讓它滾動、急衝、「Z」字行走及轉圈；最誇張係佢背後設有彈弓，一拉一彈即可讓車身跳過80cm高障礙物，玩時就唔怕家中雜物阻頭阻勢啦！特別一提，Jumping Sumo前方設有廣角鏡，既可讓用戶實時觀看畫面，還可影相拍片，再儲存於微型USB內。顏色方面，Rolling Spider有紅、藍、白三色，Jumping Sumo則備有黑紅、卡其黃及白黑，全部8月上市。
查詢︰2736 1733
