SH-06F便攜贏晒

買得平板電腦，九成都係貪佢芒大，同時亦預咗體積、重量會累贅啲。咁有冇可能大屏同輕巧兩者兼得呢？剛剛由日本水路到港嘅Docomo AQUOS PAD SH-06F就係示範作，此機定位係Phablet，擁有7吋屏幕，但機身體積竟然只係比一般手機大少少，單手拎超方便！而廠方仲話佢係「世界最輕量」LTE 7吋平板，僅重233g，比一眾主流平板輕超過20%，論便攜贏幾條街！

SH-06F $5,380
採用「EDGEST」設計，邊框窄到暈。

機背設有800萬像素鏡頭，雖然內置多種拍攝模式，不過低光之下拍攝，雜訊都幾明顯。

隨機附送座枱支架，睇片更方便。

支援IP5/7防水標準，記憶卡、SIM卡槽都有保護蓋。

機側的音量鍵及開關鍵均用上磨沙銀色，摸上手好有質感。

機身只有8.7mm，配合233g之重量，實屬輕巧便攜。

一般平板（左）例牌有明顯黑邊框，而SH-06F（右）條邊框就大幅收窄，令機身細一大截。

於主頁向下拉就會開啟新聞中心頁面，不過就只有日文版本。

於主頁向上拉就會彈出半截式功能表，設計特別。

《KAKU Notepad》可以隨時於畫面上記事、畫畫，超方便。

雖然用上四核心處理器，不過行Benchmark得分竟然偏低，幸好實際操作完全唔窒。

用盡機面

第一眼睇SH-06F，不禁會質疑：「究竟個芒有冇7吋？」之所以有如此錯覺，全因採用「EDGEST」窄邊框技術，將屏幕四邊黑位盡量收窄，大幅減少機面多餘位，廠方就話屏幕佔機面面積達81%！再搵埋其他7吋平板比較，就會發現SH-06F邊框確實窄得交關，亦直接令機身體積比其他機款細一大截，單手拎或者擺落衫袋、褲袋都零舍方便。難得機身尺寸縮水，但其7吋屏幕仍然有好高水準，備有全高清畫質，最重要就係繼續用上招牌IGZO技術，顯示細緻之餘，亦特別慳電；加上採用「PureLED」技術，顯示紅色物件時色彩尤其鮮明，效果超掂！

激輕似手機

除體積夠細外，SH-06F亦夠輕，機身只重233g，廠方話係「世界最輕量」7吋LTE平板電腦，真的嗎？比較埋其他7吋平板，好似341g嘅iPad Mini及290g嘅Nexus 7 2014版本，此機就分別輕31%及19%，亦只係比某啲大芒手機重少少，攞上手好明顯輕盈得多。值得一提，SH-06F支援香港4G LTE網絡，亦兼具通話功能，加上機身設有喇叭及咪高峰，擺埋耳邊傾電話都冇問題。

頂級規格

規格方面，SH-06F與一眾旗艦Android產品一樣，採用Qualcomm 2.3GHz四核心處理器及2GB RAM，內存高達32GB之餘，亦可以外加記憶卡，操作流暢，擴充力亦合格。順帶一提，佢亦改用自家介面，跟一般Android介面之分別，在於主頁向上拉就會彈出分割式功能表，向下拉就會開啟類近新聞中心嘅頁面，提供不同類型新聞，可惜只得日文版本，識日語先啱用。另外，用家亦可長置《KAKU Notepad》快捷鍵於虛擬功能欄上面，咁就可以於任何畫面隨時記事同畫畫，相當方便。