這次同三個老友到當地閒遊，試了一些食肆，有百年老店、私房菜，連鎖店，也有不少驚喜。大家先到上下九步行街，我表示要到「廣州酒家」，因為上次兩點半才到沒有飲茶，但這次到了又冇得飲，職員說：「依家兩點，大部分點心都無了！」失望！於是到不遠的百年老號「蓮香樓」，當中春卷、葱油餅最難食，而小籠包、粉果、蝦餃、荷葉飯就不錯。之後到樓下的餅店，發現有老公餅，問職員甚麼是老公餅，她說：「老婆餅甜、老公餅鹹，都是冬瓜蓉！」買了一個老公餅，原來鹹是好難食的！在晚上，因之前見過天河林和西路有間順德私房菜，大家決定去試。它叫譽品，看到其他食客叫了一窩窩的粥，我們都單點此菜，卻非常有驚喜。最意想不到的是那道用豉油炒的陳村粉，味道口感均一流！之後是順德香芋煎餃，那芋香味也是久違了，原來芋頭真係有芋頭味o架！朋友點的煎魚餅及凍魚皮我就麻麻地，而我卻點了隔夜釀涼瓜！咁老實？真係隔夜？不過真係熟了好耐，個涼瓜好味，但釀肉太厚太大舊，有些不太熟，要再煮一煮！第二天我們到體育中心試了集團式的俏江南，印象中好似深圳也有，又係驚喜，那功夫茶聊雞前菜，光是一杯用功夫茶杯放的甜茶，由棗、梅、山渣等做成凍茶，之後再食用綠茶煙熏的雞肉，好好味！其東坡肉、芋頭南瓜鑊仔炒飯都在水準之上，後來我到廣州東站旁商場試山西食物連鎖店九毛九，知道它在深圳也有分店，但之前未試過，它叫九毛九是當初開店為賺少一毛，食物多以九毛九作尾數，我叫了刀削麵配炸醬，合我口味，因為正宗刀削麵好厚好硬，它比較易入口，不過家常餅就失準。死了！這幾天食太多東西，又是減肥時候了！