不經不覺，「孖寶兄弟」Super Mario面世已有29年，由最初嘅紅白機2D電玩，發展至N64、NDS以至Wii時代，仲有3D版，不過要數最立體嘅Mario，當然係最近推出嘅SHF Figure；它成為今期玩具界嘅熱搶Item，事關Mario嘅獨立主體Boxset，連埋其餘兩款情景場景Diorama Play Set，一套三盒，成套街價三舊多啲就有交易。可以砌出似模似樣又滿載集體回憶嘅打機場面，乜都抵番晒！

水管備有兩種高度，水管口又可以拆出嚟互換。

換上Set B嘅造型手掌，加埋透明插榫，就可擺到抱龜殼甫士。

SHF Super Mario
建議零售價：$249.9

SHF Diorama Play Set A
建議零售價：$199.9

SHF Diorama Play Set B
建議零售價：$199.9

可玩性贏晒

先講主角Mario，無論係紅白機或者後來嘅3D電玩版本，肥仔嘜身形始終如一，SHF版本當然跟到足，至於大眼、大鼻，仲有翹起嘅鬍鬚等面容特徵，都全部呈現。雖然Mario Figure化唔係今時今日先有，不過論可玩性之高，SHF認第二冇人敢認第一，首先可動性已經贏晒，頸、肩、肘、腕、髖、膝、踝都有可動關節，可以傳神擺出垂直跳躍及向前跑等招牌甫士，而且關節位都收得幾靚，盡量保持線條上嘅完整性。不過隨盒配件唔算多，只有一枚金幣、一個紅菇及一粒問號磚，想砌情景嘅話，就要買埋同步上架嘅另外兩款場景Diorama Play Set了。

場景無限Key

Diorama Play Set一共有A、B兩盒，Set A就有兩粒實心磚、一粒問號磚、一枚金幣及一個蘑菇敵人，連埋Set甫士嘅支架；Set B就有一高一低嘅水管、一枚金幣、一個蘑菇敵人及一個龜殼，仲有一對專門用嚟捧龜殼嘅造型手掌，連埋Mario主體Boxset，就可重組一幕又一幕嘅電玩場面，例如丟龜殼打蘑菇。美中不足是Mario主體嘅頭部轉動角度相當有限，若果頸關節改用拉出式設計，相信問題可以迎刃而解。雖然Bandai仲未公布會唔會有Box 4、5、6嘅SHF Mario產品推出，不過筆者深信，唔使幾耐Lugi、公主等人氣角色都會逐一產品化，例如喺「魂Shop」以網購形式出售，令SHF Mario成為玩具迷嘅另一個深坑，會否講中就要拭目以待了。

查詢：2433 1828（瑞華行）©Nintendo