老老實實，筆者好耐冇去尖沙咀行街，尤其是廣東道一帶，成條街嘅人都講「煲冬瓜」，好似搭錯車去咗深圳！不過幾惡頂都好，今期點都要破例，「誓要去，入刀山，浩氣壯，搵伊巴」，我冇唱錯，你都冇聽錯，唔止伊巴謙莫域，仲有C朗拿度、尼馬等合共八位超級球星嘅巨型Figure，即日起坐鎮海港城海運大廈門口、天星碼頭附近，身為球迷點可以唔親臨朝聖兼自拍一番？

Cristiano Ronaldo@ Risk Everything

Nike Risk Everything球星Figure展覽即日起在尖沙咀海港城舉行，直至7月13日。

David Luiz@Risk Everything

Rooney@Risk Everything

Ribery@Risk Everything

Iniesta@Risk Everything

Neymar@Risk Everything

Ibrahimovic@Risk Everything

Howard@Risk Everything

為求勝利、不惜一切嘅白頭科學家，分析一眾頂級球星嘅所長後，炮製咗複製人兵團，橋段咁似《Star Wars》前傳嘅？

以往充滿激情、為球迷帶嚟驚喜嘅球星被迫紛紛轉業，伊巴拍烏蠅賣自傳，C朗亦只好到時裝店做模特兒公仔，令一身爆肌仍然有用武之地。

昔日叱咤球壇嘅朗拿度，對於足球場變得沉悶、功利都睇唔過眼，一於Nick Fury上身，重召天才球星歸隊。

包括C朗、伊巴及朗尼等人走入足球神殿，重披戰衣後，聯袂下山再踏綠茵場。

即使複製人球隊喺門前擺起大巴陣，尼馬依然無所畏懼，一於以高速插花突破重圍。

無論轉行做咗髮型師，或者返到球場重操故業，尼馬依然咁Chok、咁鍾意Selfie。

返回綠茵場嘅大衞雷斯，由昔日無神無氣嘅髮型師，變番做生氣勃勃嘅球場雄獅。

8大球星變身卡通Figure

今次由Nike Football大陣仗主辦嘅Risk Everything展覽活動，展出咗C朗、伊巴、朗尼、列貝利、尼馬、恩尼斯達、大衞雷斯及侯活八位球星Figure，不過並非見慣見熟嘅真人造型，而係變成卡通Look，個個好似《The Incredibles》（超人特攻隊）上身咁款，事關製作靈感嚟自Nike與Wieden + Kennedy及Passion Pictures共同製作、剛剛喺網上發表嘅《The Last Game》動畫短片。每個Figure都準確掌握到球星神髓，入形入格，例如被譽為球場呂布嘅伊巴，就擺出高難度嘅半車身抽射；仲有瞓身剷波嘅大衞雷斯，似足獅子王，同真人一樣咁有氣勢；講到最當時得令排頭位嘅C朗，唔止靚仔，仲擺埋射罰球嘅招牌A字腳甫士，加埋一身醒目嘅葡萄牙波衫，仲點會認錯呀？

CG動畫演繹美麗足球

至於全長5分28秒嘅《The Last Game》足本版本，已經喺nike.com發表，仲同步上載至YouTube，中心思想係帶出足球之美在於「Risk Everything」。短片初段描述一位精於計算嘅科學家，打造咗一支複製人球隊，雖然隊員身懷各路球星嘅絕技，但打法毫無創造性，令足球變得功利、沉悶，原本班球星仲被迫轉行，好似伊巴走去開報攤，而一向鍾意Show肌嘅C朗，竟然去咗時裝店充當模特兒公仔，仲有尼馬及大衞雷斯要做髮型師打發時日。呢個時候，「大哨」朗拿度終於忍無可忍，決定出手「救市」，重召呢班足球明星，搵番鬥心，重踏球場與複製人兵團決戰。到底呢班Nike球星能否用膽識、創意及熱血光復綠茵場，令足球再度激動人心？我唔劇透喇，你哋自己睇片搵答案啦，不過話時話，成條橋咁似《少林足球》嘅？

網址︰www.youtube.com/watch?v=Iy1rumvo9xc