Motorola被Lenovo收購之後，咁快就有新機報到？其實今次抵港嘅係Motorola仍係Google年代的產品Moto X，美國早於上年九月已經賣街，仲狂玩自由配色；而香港用家就冇得揀百搭顏色，只得黑、白兩種。規格方面，就同外國版本相若，內置4.7吋720p屏幕、1.7GHz雙核心處理器及2GB RAM，講硬件的確比好多旗艦機輸蝕；不過廠方講明軟件先係賣點，介面似足公版咁簡約，而且仲有唔少貼心功能，例如快速啟動相機及「使用中顯示」；前者於任何情況下手握機身再扭兩下手腕，就會即時啟動相機；後者只要於黑暗環境取出手機，畫面就會以淡入淡出方式間歇顯示時間、未接來電及電郵等訊息，唔使特登着芒睇，屏幕自然慳電得多。最重要係港版全支援1,800及2,600MHz頻譜，可用香港4G網絡，上網速度夠晒快。

行貨僅備有黑、白兩色，唔似美國發布時咁玩自由配色。$3,698

「使用中顯示」以淡入淡出方式於待機畫面間歇顯示時間及未接來電、電郵等資訊。

行貨為三腳火牛，設有兩個USB插口。

查詢：2980 8088