小米前日在北京搞發布會，事前盛傳會推出小米手機3S或者平板電腦，結果新手機就冇，反而傳足幾年的平板電腦終於登場。這部小米Tablet處女作可以話落足料，有Retina級靚芒及NVIDIA全新四核處理器，最平16GB版本只售$1,499，大約港幣$1,900有找，咁高性價比，去邊度搵？

小米平板6月起由「米粉」公測，距離賣街尚有一段時間。

機背用上拋光物料，易黏指紋，較難打理。

配備7.9吋4：3比例屏幕，遠睇都幾似iPad Mini。

4：3屏幕比例用嚟睇片未夠爽，不過睇電子書及網頁就超舒服；加上唔算重，手持唔見攰。

畫面清晰細緻，對比度亦高，顯示效果不俗，可惜睇高清影片畫面上下有黑邊。

新增小工具頁面，將Widgets集中一頁，操作容易。

主頁採用4×7布局，一頁可以擺28隻Apps，頁面空間充足。

拉下狀態欄再橫掃即會見到快捷功能鍵，進行簡單設定夠晒直接。

玩窄身彩色邊框，跟機Soundbar跟電視夾番同一隻色，感覺好Young。現場播1,080p高清片，可見色彩自然準確，層次分明。

採用MIUI TV介面，提供電視、在線電視、遊戲中心等多項功能。

現場花絮
發布會於北京會議中心舉行，「米粉」要一早排隊先可入場，目測有成幾百人，好墟冚！

小米董事長雷軍繼續其個人騷，親自講解新產品的特點。

今次新Tablet簡單叫「小米平板」，同以往產品命名方法一樣。雖然行Android，不過小米董事長雷軍就話平板電腦要成功，就一定要向iPad學習。因此小米平板嘅設計及屏幕尺寸都有唔少Apple元素，屏幕為7.9吋，就連2,048×1,536解像度及4：3比例都同iPad Mini Retina一樣，而且用上IPS素材，可視角、飽和度、亮度都有超高水準，顯示效果亦同iPad Mini Retina相近，可以話打贏晒一般Android平板，上網、睇電子書零舍正！賣相方面，小米平板有黑、白、粉紅、黃、藍、青多色機背選擇，亦用上拋光塑膠，似足iPhone 5C，稍欠新意。

高效新CPU

屏幕高質之外，小米平板連規格都屬頂班。有別於一般Android裝置，小米平板並非用Qualcomm或者MediaTek處理器，而係年頭發布的NVIDIA旗艦Tegra K1處理器，內置四個高效及一個低功耗核心，時脈高達2.2GHz；現場雖然未有預備應用程式供筆者一試其效能，不過廠方話試行《Antutu》得分逾40,000，比「跑分」約35,000的現有其他旗艦Android裝置優勝。此處理器主打圖像處理效能，據講可應付PC級遊戲，鍾意打機的用家可能合用。

64GB更抵玩

一如小米手機、小米盒子等產品，小米平板都採用自家MIUI介面，廠方仲特意為平板將介面加以改良，例如瀏覽器會將常用功能如「書籤」、「重新載入」等放於畫面左右；應用商店就用分頁設計，橫掃即可進入另一大項，亦同時提供平板程式專區，令整體操作更適合於大芒裝置上使用。售價應該都係一眾「米粉」所關心，小米平板定價為$1,499（約港幣$1,883），即係Android「板王」新版Nexus 7（港幣$2,398）的八折左右，而且機能明顯勁好多，計落抵玩得多。值得一提，除16GB版本外，亦有64GB，售價僅比16GB貴$200，但就多成48GB裝Apps同擺相擺片，識揀就一定揀64GB！小米平板約於6月率先予「米粉」公測，暫時未知確實開賣日期，香港會否有售亦係未知之數，大家等進一步消息吧。

SPEC

屏幕：7.9吋IPS（2,048×1,536解像度）

處理器：NVIDIA Tegra K1四核2.2GHz

記憶體：2GB RAM、16GB或64GB ROM

支援最高128GB microSD

鏡頭：後置800萬像素、前置500萬像素

對外連接：802.11ac、藍芽4.0、Wi-Fi Direct

電池容量：6,700mAh

作業系統：Android 4.4

體積：202.1×135.4×8.5mm

重量：360g

售價：16GB $1,499、64GB $1,699

推出日期：待定

網址：www.mi.com

同場加映：￥3,999買4K電視連音響

北京會場仲有部「小米電視2」，屬小米電視升級版，其幼邊框係全鋁合金，做功細緻；仲提供紅、粉紅、藍、紫、綠、金等色水選擇，年輕用家應該Buy。規格方面，與上代一樣支援3D顯示及MIUITV智能系統，尺寸由47吋微增至49吋，解像度則由1,080p升級至4K（3,840×2,160），配合4K圖像增強技術，就算睇1,080p訊源，顯示效果都會有所提升。最特別是「小米電視2」會連埋專屬音響一併出售，包括一組Soundbar以及低音喇叭；其定價為￥3,999，5月27日於內地發售，暫時未知香港會否推出。