喺芸芸同Nike有關嘅國家隊波衫之中，英格蘭都算係最遲出場嗰個，仲惹嚟唔少批評聲音，皆因英國本土有唔少球迷，就連首相卡梅倫都話嫌貴；至於香港嘅英格蘭粉絲一向特別多，但都有唔少人話主場波衫冇Design，似件白底衫加個隊徽就算數。老實講，筆者睇過實物，又了解過佢嘅功能設計後，平心而論又唔係咁差喎！

英格蘭主場落場版球衣 $849

英格蘭主場球迷版球衣 $539

英格蘭作客落場版球衣 $849

英格蘭作客球迷版球衣 $539

落場版嘅腋位設有大型氣孔，加強透氣效果。

隊徽底色用銀線繡成，強光照射下分外耀目。

後領內側嘅三角旗標誌之內，印有由銀色細線組成嘅St.George十字圖案。

膊位加上反光緞帶，設計靈感來自古時嘅英格蘭騎士鎧甲。

巴西作客版球衣

法國作客版球衣

荷蘭作客版球衣

葡萄牙作客版球衣

南韓作客版球衣

澳洲作客版球衣

分清雙版本：（左起）落場版、球迷版
主場嘅落場版背後有V形暗紋，球迷版就只有直間紋理。

作客嘅落場版背後有微細氣孔，球迷版欠奉。

作客嘅落場版隊徽用上立體刺繡，球迷版就平面得多。

作客嘅落場版衫腳用咗開叉剪裁，球迷版就改用平腳。

英格蘭嘅主場配搭，一向係白衫夾藍褲，不過2014新版本就改為全白色一個Tone，根據Nike Football足球全球創意總監Martin Lotti所講︰「我哋參考咗兩個設計要素，分別係1970年英格蘭出戰墨西哥世界盃時嘅全白色裝束，以及英國古代嘅騎士鎧甲。」點解有1966或者1990呢啲風光日子唔揀，偏要揀1970年（編者按：當年英格蘭只係打到入八強）？筆者就不得而知，不過全白色就等如唔好睇？見仁見智啦，皇馬唔係全白Look咩，又唔見有人話齋？

反光緞帶 披甲上陣

當筆者拎件英格蘭新主場波衫實物上手，驗屍官上身由頭Check到尾之後，發覺都有唔少細節位，好似衫身表面用咗直間暗紋，落場版嘅背面仲有令人聯想到Victory嘅V形紋理，至於隊徽嘅底色摻入咗銀色，增加華麗效果。最特別係正如Martin Lotti所講，設計靈感之一來自古代嘅英國騎士鎧甲，所以肩膊位加咗富光澤感嘅白色緞帶，就連波褲左右都有同樣設計，至於後領內側嘅三角旗標誌之內，亦有由銀色細條紋組成、象徽英國騎士時代嘅St.George十字圖案。總括嚟講，其實呢件新波衫嘅Image都幾簡約，但唔代表求其，以上所講嘅細節位仲幾有歷史味道，可惜衰在與主色太接近，令人好易走漏眼。作客款式方面，就用咗紅衫白褲呢個吉祥組合，事關英格蘭喺1966年世界盃決賽上，就係咁樣着法，結果贏咗西德而捧盃；2014年嘅新版本，隊徽同主場一樣用咗銀色打底，後領內側亦有十字圖案，不過冇咗膊頭嘅反光緞帶，反而正面印咗大型嘅十字圖案暗花，可惜與主色嘅深淺度分別唔大，所以唔算明顯，遠睇先至覺。

透氣之餘 致力環保

講明係波衫，Design幾靚都好，筆者一直深信功能設計先係主菜，要試真功能上嘅高低，當然以落場版為準，不過唔只Nike，好多品牌嘅慣例都係只有主場先會入齊球迷版及落場版，作客就只會出售球迷版，令波衫收藏家感到滿不是味兒；好彩今次嘅英格蘭新波衫破例，主客都有齊球迷版及落場版，三獅兵團嘅超級粉絲開心晒啦！同球迷版相比，落場版嘅最大分別有兩個，其一係兩腋設有雷射切割嘅大型氣孔，透氣效果自然更高；其二係剪裁上明顯修身咗，想Carry得好睇，還請閣下的起心肝操Fit Body。

不過無論球迷版或落場版，最令筆者畀Like嘅地方，係波衫材料有96%由再生滌綸製成，而波衫及波襪就分別佔100%及78%；再生滌綸就係回收廢棄膠樽改造而成，據品牌表示，衫、褲、襪整套裝束平均用咗18個膠樽製成。呢種環保嘅製衣方法自2010年開始，至今已經令20億個膠樽重獲新生，足以覆蓋超過2,800個標準足球場，將足球與環保結合，仲唔抵畀Like？

查詢：2388 3348（旺角花園街Nike Football）

作客球衣藍白玩晒

唔少Nike嘅國家隊主場波衫，其實喺今年初已經相繼推出，至於作客版本就留到依家先至亮相，無獨有偶，大部分都非藍即白，對於偏好呢兩種顏色嘅球迷而言，會否刺激起你嘅入貨意欲呢？