HTC Desire 816 dual sim手機Selfie王

《Instagram》入面嘅hashtag「#selfie」相片竟然有超過一億幅之多，證明自拍確實風靡全球！想自拍效果索爆，未必要靠天價嘅自拍神器，手機都一樣得。近年主打攝影嘅HTC啱啱推出中價機Desire 816 dual sim，佢有個500萬像素嘅高質前置鏡頭，美白、特效任你玩，自拍博Like從此話咁易！

機背用上拋光物料，外觀靚仔，不過就極易黏手指紋。

前置鏡頭高達500萬像素，BoomSound前置雙喇叭聲音夠響，不過音量校到最大時有輕微坼聲。

1,300萬像素後置鏡頭日光下拍攝成像不俗。

機身右側係SIM卡及記憶卡槽，雙SIM均係nanoSIM，用家可能要去換細卡。

備有5.5吋720p大芒，睇片、煲劇效果都唔錯。 $2,798

試相
用上5級美膚程度，自拍肌膚更加滑溜。

雖然用上入門級處理器，不過行Benchmark得分都逾20,000，拍得住上代高階機。

簡易模式將畫面變成一格格，更易操作。

拋光背似5C

HTC手機設計向來有心思，Desire 816 dual sim都唔例外。其5.5吋大芒有720p解像度，煲劇絕對夠用。睇片當然唔少得機面嘅BoomSound雙前置喇叭，喇叭發聲孔由One系列嘅密麻麻變為八點一排，設計簡約；現場試播，聲量夠大。而小記最鍾意係其機背用上拋光塑膠物料，驟眼睇幾似iPhone 5C。值得一提，暫時抵港只有白、灰兩色，嚟緊仲會有搶眼嘅橙色。

高像素鏡頭

HTC One系列以UltraPixel鏡頭做賣點，但有用家話400萬像素撐唔大。Desire 816 dual sim雖冇UltraPixel鏡頭，不過就將鏡頭像素提升至1,300萬像素，可以拍攝出4,224×2,368嘅相片，其前置鏡頭仲犀利，高達500萬像素，兼有一系列自拍功能，好似自拍倒數；1至10級嘅美膚程度；又有不同嘅相片特效，加上可將音量鍵設定做快門鍵，自拍方便！嫌美白、特效唔夠喉的話，仲內置柔膚、美白、小臉、大眼等效果，靚女們必讚。

Sense 6新介面

此機支援雙卡雙待功能，不過只可「單通」，換言之一卡通話時，另一卡便無法使用；幸好有「自動轉駁」功能自動將號碼飛線。硬件方面，採用入門級Qualcomm Snapdragon 400四核處理器搭載1.5GB RAM，性能合格，而且預載Android 4.4作業系統及HTC Sense 6介面，舊功能好似BlinkFeed主頁固然有，就連簡易模式、極致省電模式都有齊，前者會將畫面變成大格，方便唔慣用Smartphone嘅用家；後者會於電量不足時限制背景數據及僅提供基本功能，令電力續航力得以提升。順帶一提，除咗雙卡版本之外，廠商話遲啲會出埋4G單卡版本。