Gaming耳機鬥聲準
達人G身痕到極,PS4及XBox One兩款新Console主機都唔等行貨賣街,寧願高追水貨。要盡興,當然要買埋對應新主機嘅打機Headset。近來Game壇熱賣兩款同以光纖傳輸音訊的耳機,能夠模擬杜比7.1聲道,定價不過二千, 十分親民。當中線控耳機Astro A30附有專用擴音機,背景人聲任你調校;而潮牌Skullcandy Plyr1無線耳機專攻臨場感;究竟邊款正啲?達人G請來FPS機后Kali齊齊試真啲!
Astro 30 $1,699 (a)
Skullcandy Plyr1 $1,449(b)
Astro A30應付槍聲同敵人腳步聲時,定位準確,判斷敵人位置甚有優勢。
Skullcandy Plyr1耳罩較貼耳,隔音效果佳,空間感營造強烈,臨場感十足。
備有專用光纖端子將音訊傳到專屬擴音機MixAmp Pro解碼,再經接線輸出至耳機。
MixAmp Pro有旋鈕控制背景聲效及人聲比例平衡。
解碼器同時也是Display架,背後更預留Aux In提供傳統紅白雙色線輸入。
右邊耳罩有搖桿控制音量,旁邊的推鍵提供三種EQ場景模式選擇,作聽歌、睇片及打機之用。
Astro A30收音較靈敏和響亮,咪高峰離嘴都相當應聲。
Skullcandy Plyr1收音較細聲,有時要靠推高音量先可以同隊友溝通。
Astro A30耳罩輕巧細隻,長期戴住唔會頭痛。
Skullcandy Plyr1耳罩包覆度高,雖有良好隔音效果,但戴得耐有點局促。
第1回合:鬥音效精準:Draw!
如要試現場聲效,最好必試XB One機械人射擊作品《Titanfall》,事關火力猛烈,槍戰場面較響亮。而今次達人G就邀請FPS達人Kali幫手試機,由於兩款耳機均能模擬7.1聲道,因此關鍵在於能否營造出逼真臨場感。首先Astro A30在槍戰時,槍聲指向性比較清脆和精準,敵人腳步聲亦能清晰辨別方向,唔驚畀人偷襲。而Skullcandy Plyr1耳罩較厚身及貼耳,背景低音夠強勁,衝鋒陷陣時好有臨場立體感,打得零舍投入。呢個Round,平手啦!
第2回合:鬥通話清晰:Astro A30 Win!
同隊友保持清晰對話,仲要唔怕有遲緩情況出現,合作殺敵時先容易建立默契。Astro A30通訊較響亮,收音方面相當靈敏清晰,加上利用擴音機微調背景跟人聲比例,操作簡便又貼心。反而Skullcandy Plyr1要貼近收音咪先可以跟隊友對話,雖然2.4GHz無線傳輸無遲緩情況發生,但要用耳罩上的細小搖桿調校音浪,容易推錯方向以致調校錯誤,相比之下Astro A30簡單直接得多。
第3回合:鬥佩戴舒適:Astro A30 Win!
機迷玩親FPS Game一打就係幾個鐘,如果耳機戴得唔舒服好易影響水準。Kali認為Astro A30設計輕巧美觀,半夜戴住打足六粒鐘都唔會頭痛。雖然耳機線材限制玩家活動範圍,但就唔怕玩太耐會突然沒電,續航力非常穩定。至於Skullcandy PLYR1耳罩體形較大,設計較貼耳,戴得太耐會有侷促感覺。無線耳機雖不會有接線糾纏,但打到中途無電時,耳機會「嗶嗶」聲響,隨時通訊中斷,超掃興,所以Astro A30稍勝。
達人G結論:耳機穩定為先
市面不少耳機均標榜無線設計,雖然大都有不俗續航力及具備2.4GHz速度傳輸,但始終有線耳機兼具較實淨和精準的音色輸出,長期打機時亦唔驚因隨時斷電而拖累戰況。難怪Astro A30有不少外國機迷追捧!
SPEC:Astro 30
單元:36mm
頻率響應:20~20kHz
靈敏度:97±3dB
阻抗:32Ω
Skullcandy Plyr1
單元:40mm
頻率響應:20~20kHz
靈敏度:104±5dB
阻抗:29Ω
Profile
達人G
試科技產品多過你試衫,唔知買咩機好?信佢冇走寶。
查詢:
(a)2782 0978
(b)2359 7998