輕薄如DC NX mini女仔心心眼

智能手機出mini版已習以為常，今次Samsung都將自家NX系列換鏡相機「mini化」，推出有如DC般輕薄的NX mini換鏡相機。NX mini機身厚度為22.5mm，淨重只有158g，就算入電入卡、插埋支9mm餅鏡，拎上手都好輕身。機身還搭載3吋「自拍芒」，連線影相、過相功能亦強化唔少，加上三千頭入手價，應該可令唔少女生「心心眼」！

$3,290（連9mm F3.5 ED鏡頭）

NX mini用上microSD卡儲存相片及影片。

改用新NX-M接環，鏡頭焦距轉換倍率為2.7×，一支9mm鏡頭即等同24mm。

機身搭載可向上揭180度的3吋屏幕。

可用智能手機遙控相機影相、拍片，亦可設定快門、光圈等參數。

NX mini支援一觸對焦、一觸即拍等多種觸控模式。

內置「美顏模式」，但不設多段執相效果。

貪方便可選「Auto Mode」，相機會幫大家揀最合適場景模式；想自己控制多啲，一樣有「Manual Mode」選擇。

對應SMART CAMERA 3.0，無線功能更加豐富。

NX mini另設粉紅色版本，但要到四月底先有得賣。

試相
微距拍攝效果都幾Sharp，不過層次感就比其他換鏡相機略遜。

廣角端變形未算嚴重，亦沒有出現紫邊問題。

採用縮水NX-M制式

為咗爭女性市場，一眾換鏡相機都鬥輕、鬥薄，目前就以NX mini最輕巧，就算加裝9mm F3.5套裝鏡頭，整部相機都一樣輕到大風啲都吹得起，放落手袋或Clutch都冇問題。NX mini機身顏色選擇依家得白色，四月底就會出埋「Gwiyeowo」（韓文可愛咁解）的粉紅色版本！Samsung今次亦為NX mini改用「收身版」影像感應器同鏡頭系統，其BSI CMOS尺寸只有13.2×8.8mm，比原來NX系列的23.5×15.7mm尺寸感應器縮水一大截。此機的NX-M接環需配上新NX-M鏡頭使用，鏡頭焦距轉換倍率達到2.7倍，如跟機的9mm F3.5 ED餅鏡，換算下即等同135制式的24mm，都夠Wide。

180度反芒自拍最啱

當然，以女性為銷售市場，NX mini都特別照顧到自拍的需要。NX mini機背設有可向上翻180度的3吋顯示屏，加上內置「美顏模式」，想拍出滑漏的自拍相都無太大難度，不過所內置的「美顏模式」並無多段執相效果。至於操控方面夠晒簡單，大部分操作都可靠觸控畫面做得到，仲可以自揀一掂畫面自動對焦，一掂畫面即拍或一掂追焦等唔同選項，想點玩都得；或者再簡單啲將拍攝模式轉成「Auto」，相機仲會幫你揀選最適用的場景模式。想自己控制多啲，NX mini亦設有光圈先決、快門先決以至手動模式都有。至於拍攝效果都相當唔錯，雖然講畫面層次未算上佳，但比起DC仔已高出唔少。

強化無線功能傳相更易

NX mini支援新版本SMART CAMERA 3.0，只要跟具備NFC功能的智能手機一拍即可連接，或者用傳統方法開啟Wi-Fi連接都得。SMART CAMERA 3.0強化原有的遙控取景同抄送相片功能，就好似遙控取景時，可以在手機上設定快門、光圈、ISO同白平衡，校到啱就再掣影相拍片；抄相方面，可用AutoShare將相機拍低的數碼影像即時傳到手機，另亦可用MobileLink事後傳相，如果想分享畀幾個朋友一齊睇的話，仲可用埋Group Share功能，最多可分享畀四部手機或平板！不過NX mini係新制式相機，暫時鏡頭選擇較少，除Kit鏡之外，只出多一支9~27mm F3.5~5.6標準變焦鏡頭，定價$1,790；相信只要反應好的話，廠方肯定會出多幾支鏡頭畀大家玩。