據非正式統計，若果要將本地明星Figure化，論人氣，林雪排第三，發哥排第二，第一必定係任達華，君不見行一轉皆旺商場，土炮華哥Figure何其多？不過好快我哋就唔使再買土炮貨，事關Enterbay將於下月初推出《救火英雄》壓軸作品—1/6嘅「培總」李培道，用盡全公司嘅人力物力，將華哥戲中最真實嘅一面呈現喺大家眼前，難怪日前華哥睇過試辦後，都由衷咁話︰「100%似，最似堂眉！」

服裝參考香港真實消防服而製，素體亦重新打造，全身有40個關節，保證靈活，至於推出日期為下月初，售價方面仲有待EB稍後公布。

華哥指Figure最似係堂眉，眼神又夠堅忍，同佢真人一樣。

氧氣筒包喺專用背包內，仲附有支架、肩帶及金屬扣等，製作十分認真。

五官、輪廓到晒位，高清技術下呈現似足真人嘅皮膚紋理。

隨盒另有一個面罩頭雕，內藏LED燈，開着之後更有Feel。

正式推出時，除咗跟埋未點着嘅煙仔，仲有圖中點着咗嘅另一款式，還原「人定勝煙」精神。

外套追加萬用掛鈎，專門用嚟掛手套。

頭盔連面罩當然唔少得，側面仲印埋代表龍鼓灘分局嘅「LKT」字樣。

防護長褲嘅膝頭位加咗防磨物料，似足真實嘅消防服。

導演郭子健參與咗整個Figure開發過程，務求每個Detail位都盡善盡美，連佢都話如果有埋戰損版華哥頭雕就更完美。

華哥被Figure化唔係新鮮事，唔計土炮DIY作品，ZCWO都出過《機動部隊》嘅Sam哥，EB亦都出過《風雲2》嘅絕無神，不過論神似程度，《救火英雄》嘅培總就更勝一籌，皆因華哥及導演郭子健參與咗整個開發過程，單計頭雕都大執過幾次，務求盡善盡美，郭導表示︰「眾所周知本人係Figure迷，屋企儲落唔少消防員，所以好明白玩家嘅需要同鍾意啲咩，例如要靈活性高、裝備又要像真，最好有埋舊化感。今次我有份參與其中，自然將以上嘅一切要求加落Figure身上啦！」

還原角色精神

戲中李培道任職消防總隊目，粗獷熱血、嚴厲專業，愛說教亦有詼諧一面，華哥將角色演繹得淋漓盡致，佢睇過Figure之後，他亦指頭雕還原咗以上嘅培總精神︰「雖然Figure係膠質，我冇膠質！但真係100%似，尤其係雙眼同堂眉捕捉得好好，流露番角色堅忍、有耐性嘅一面。」華哥仲話會買番隻送畀囡囡，等佢時刻見到Daddy。試辦似成咁，相信大家應該收貨，不過據知推出時隨盒只得真人頭雕及面罩Look各一個，若果出埋戰損版就更加圓滿了。

全身Parts入晒戲

培總戲中名句︰「戰勝煙，就要比煙更毒」，所以佢時刻將支煙仔放喺頭盔內警惕自己，咁重要嘅道具，Figure當然做埋出嚟，華哥忍不住激讚︰「成套戲就係講人定勝煙，所以跟埋火柴同兩支煙仔，唔只設計細心，仲勾番起觀眾嘅回憶。」勾起回憶嘅又豈止呢啲小配件，Boxset仲有防護頭套、內衣、外套及吊帶長褲，全部經過舊化，令粉絲記番起成班救火英雄衝入火場一刻，至於頭盔、救生繩，以及金屬製氧氣筒連呼吸器亦有好高嘅像真度，EB仲表示正式推出時，外套會加多一個萬用掛鈎，可以掛對手套上去，100%忠於香港消防服嘅配套。

查詢︰2332 3615（Enterbay）