聯想題：辣得嚟又要夠綠，令你諗起乜嘢？Wasabi或者墨西哥辣椒Serrino？唔使擔心，睇大相係車就知筆者冇離題，有此一問，皆因啱啱試咗凌志（Lexus）嘅CT F Sport Passion Red，Hybrid型號標榜耗油量低，應晒車壇嘅綠色潮流，而且Passion Red唔只一身火辣顏色，仲加裝咗全套原廠跑格包圍，對於愛辣嘅揭背車迷而言，仲唔流晒口水？

Lexus CT F Sport Passion Red

尾泵把加裝咗導流槽，散發Racing Feel。

隨車備有四種駕駛模式，配合唔同路況需要，最好玩當然係Sport模式。

1.8L直四引擎配電動馬達，135ps總馬力喺香港地夠用有餘。

Passion Red強調動感造型，全車線條亦顯得剛直有力。

大天窗已列入標準設備清單之內，毋須車主再破費添置。

車廂布局簡潔有序，又不失前衞氣派，符合CT系列主打年輕用家的銷售路線。

中控台頂層設有7"屏幕，對應大部分嘅車廂功能系統。

前排空間相當充足，專屬嘅皮椅又有透氣功能，坐得分外舒服。

平心而論，後排空間只係中規中矩，長腳一族都係坐前排為妙。

車尾置物量相當大，足夠放置一個大型行李篋。

於2011年首度推出嘅CT系列，係廠方首款混能揭背車（Hatchback），繼今年初加推Facelift之後，近日仲有CT F Sport Passion Red接棒，以「幻影紅」車身配「炫光黑」車頂，顏色組合壁壘分明，車身又加裝咗F Sport配件，包括鬼面罩連廠徽、碳灰色17"合金輪圈和車尾擾流板，動感形象更加強，不過先旨聲明，呢款新車屬於限量特別版，輸港數目唔多，出手要快！

空間分布欠均衡

唔只車身，就連車廂都有唔少F Sport嘅專屬部件，例如令人坐得分外舒服嘅真皮透氣座椅，以及握感實在、皮面布滿凹凸紋理嘅真皮多功能軚環，就連油門、腳踏及地氈都係F Sport版本，更添超然形象。至於中控台布局以簡約為主，按鍵間距清晰，易記易用之餘，又有7"中央屏幕總攬大部分車廂功能，用起上嚟So Easy。空間感方面，前排絕對冇投訴，不過後排可能受制於車尾要安放電池組嘅關係，唔及前排咁寬敞，好彩車尾箱挽回唔少分數，維持五座位布局之下，都夠位放置一個大型行李篋，實用性不俗。

標青節能表現

賣相加辣之餘，身為一部混能車，CT F Sport Passion Red未忘綠色本性，佢嘅動力核心係1.8L直四VVT-i引擎，馬力及扭力分別有99ps及14.5kgm，連埋電動馬達同步發功嘅話，就可將馬力推高至135ps，駕駛反應相當爽快，而且E-CVT波箱嘅運作亦更具效率，噪音又細，好適合日常駕駛之用。不過最抵讚都係低耗油表現，廠方公布嘅平均耗油量只係26.7km/L，按目前油價計算，油費只需$0.6/km，加上環保汽油私家車稅務寬減計劃啱啱修咗例，就算門檻高咗，CT F Sport都依然入圍，出車可享首次登記稅優惠，加倍抵玩！

SPEC

車型：五門五座位揭背混能車

引擎：直四VVT-i

馬力：99ps/5,200rpm

扭力：14.5kgm/2,800-4,400rpm

馬達：同步電動馬達

總馬力：135ps

驅動：前置引擎、前輪驅動

傳動：E-CVT

懸掛：（前）麥花臣 （後）雙搖臂

制動：（前）通風碟 （後）碟式

車身體積：4,350×1,765×1,455mm（長×闊×高）

平均耗油量：26.7km/L

售價：$408,900

查詢：2820 4020（皇冠汽車）