Galaxy Tab Pro 8.4吋2K好色水

買得Tablet，十居其九都係用嚟睇相、煲劇、打機，因此屏幕不單要大，畫質亦要夠靚至啱數！Samsung新出嘅Tab Pro 8.4吋就打正旗號Sell靚芒，其8.4吋大芒的解像度高達2,560×1,600，睇相超細緻，就連網頁細字都勁清晰，鍾情靚芒嘅你實識揀。

$4,198 （4G版）
$3,298 （Wi-Fi版）

採用直板設計，遠睇都幾似一部放大版Note 3。

機背繼續玩仿皮物料，手感唔錯。

4G版嘅SIM、microSD卡槽都位於機身左側，揭蓋換卡夠就手。

機底設有雙喇叭，音量輸出都幾大。

機身僅厚7.2mm，加上僅重336g，以8吋機而言算輕巧。

備有全新Content Home頁面，想睇咩類型新聞都得。

除咗新聞，Content Home頁面亦可擺放日曆、電郵、社交網絡等工具，一頁睇晒好方便。

內置《e-Meeting》等商務Apps，可以與指定Pro系列平板進行玩電子會議，同時間於不同裝置顯示相同畫面。

現場試玩，手唔算大嘅小記都可以單手手持，不過想單手篤芒就真係難啲。

屏幕勝iPad Mini

Samsung早前一口氣發布幾部全新Pro系Tablet，而Tab Pro 8.4吋就係其中一員。雖然屏幕尺寸屬系列中最細，不過解像度並無因此而調低，維持系列一貫2,560×1,600。單睇數字，已經比尺寸接近、以靚芒見稱嘅iPad Mini Retina 2,048×1,536屏幕解像度為高。現場試玩，就算細心睇圖示、網頁、圖片都睇唔出Pixel咁滯，顯示超細緻；再加上對比度、亮度都相當高，整體觀感非常好。

兼具電話功能

外形方面，機身只係厚7.2mm及重336g，輕巧程度同iPad Mini相若；不過因為採用直板、16比10嘅屏幕比例，令到機身僅闊128.5mm，一般男士們可以單手拎得穩。規格方面，此機搭載2.3GHz四核心處理器以及2GB RAM，亦可以外加記憶卡擴充容量；而小記最Buy就係其4G版本支援通話功能，機身亦備有聽筒及咪高峰，唔嫌大部直頭當佢係手機擺埋耳邊「煲粥」都得。值得一提，Tab Pro 8.4吋改用全新TOUCHWiZ介面，亦有齊集新聞、資訊於一身嘅Content Home頁面，以及遙距控制電腦嘅《Remote PC》等功能，非常實用。