千元雙卡Asha 503的骰似番梘

現時的Smartphone選擇雖多，但對於一些要求簡單的用戶來說，其實只要打到電話、玩到WhatsApp就行，高階手機對他們來說也沒多大作用。Nokia新推出的Asha 503售價一千蚊有找，但已經有齊3.5G上網、雙卡及社交Apps等基本功能，加上的骰外形似足番梘，入門用戶一定畀Like！

$998

採用Asha 1.1系統，提供下拉式選擇以開關連線裝置，用法跟Android相似。

Fastlane頁面把剛開過的內容置於同一版，方便之後重睇。

支援一按即拍，但拍攝時有點遲滯，且易受手震影響。

附送勁搶眼的桃紅色耳機，不過接聽電話尚可，聽歌略嫌漏音。

厚度達12.7mm，講真唔算纖薄，但向內微彎卻令手感不俗。

可插雙SIM卡及microSD卡，前者插槽在機側，因此毋須關機便能換卡。

機身小巧，正面看只比八達通大少許。

中階機級數

齋睇Asha 503外表真係估唔到咁平。皆因其設計、用料起碼是中階手機級數。一如以往，它採用了方正設計，機身三圍有102.6×60.6×12.7mm，未算纖薄，但拍埋八通達一比卻只大上少許，夠晒的骰。至於機背，不但四邊微微向內彎提升手感，表面更有層透明塑料包着，看起來既像冰塊、又像濕了水的番梘，配合黃、紅、白及黑四色選擇，外觀討好。

雙卡直接換SIM

受成本所限，以往Asha手機只支援2G連線，但今次Asha 503破天荒對應3.5G網絡，實測見上網速度對辦，玩WhatsApp應付有餘。唯一缺點是3吋屏幕只有QVGA質素，畫面欠細緻，而且觸控反應亦有待改善，用家要畀啲耐性了！此機亦支援Easy Swap的雙SIM卡功能，用戶毋須關機就能切換SIM卡，對中港兩邊走人士尤其方便。

操作類近Android

此機行的是Asha 1.1系統，用落有點像Android，既可左右撥頁，亦提供下拉式選單以控制Wi-Fi、藍芽等裝置。然而，它主要可用的頁面只有鎖機、程式集及Fastlane。鎖機畫面由右至左掃便能解鎖，向上滑則進入拍照模式；程式集則有齊Facebook、Line等常用社交程式，還可透過Nokia Store下載更多；至於Fastlane則可把剛開過的訊息、多媒體內容或Apps放在同一頁，方便用戶日後重用，設計細心。