亂世出英雄，雖然香港冇Robocop，又冇Ironman，好彩仲有一班救火救人嘅真英雄！本年初嘅大片《救火英雄》，金像導演郭子健透過影像向消防員致敬，最近郭導更與Enterbay合作，將戲中嘅雙主角—謝霆鋒及余文樂化身為1/6 Action Figure，由頭雕、消防制服到救火裝備都製作認真，唔只吸引到玩開Figure嘅男生，相信連謝生、余生嘅女粉絲都會「入坑」。

Enterbay Real Masterpiece《救火英雄》何永森（RM-1039）售價︰$1,480　
Enterbay Real Masterpiece《救火英雄》游邦潮（RM-1040）售價︰$1,480

霆鋒面相比較像真，五官特徵跟到足，同真人一樣咁Chok！

樂仔眼神有啲游離，好彩髮型五官尚算神似。

Boxart落埋霆鋒、樂仔兩大型男靚仔樣，Fans實走唔甩！

用咗新開發素體，高約12"，並有接近40個關節，睇得又扭得。

外套有齊口袋及反光安全帶，細節位跟得幾足。

長褲加入防磨物料，留意消防膠靴入面係冇腳掌，換唔到其他鞋。

揭開外套，就會見到內裏有埋打底衫及吊帶，製作認真。

隨盒另有一個配咗防護面罩嘅頭雕，內藏LED燈，着咗分外有Feel。

氧氣筒包喺專用背包之內，仲有支架、肩帶、調節繩索、尼龍索帶及金屬扣等，淨係呢件Parts都值回票價。

太平斧頭上下兩邊都用金屬製作，分量十足。

消防員Figure唔係新事物，不過十之八九都係玩家自組或者由雜廠推出，真係攞正電影「拉臣」推出嘅，《救火英雄》可算係首趟，玩Figure玩到入晒魔嘅郭導道出製作由來︰「我細個有兩個夢想，一係拍電影，二係將電影角色變成Figure，《救火英雄》裏面個個都係型男，加上消防員件衫好多Detail位，本身就好適合用嚟做Figure。」佢又補充，雖然製作交畀EB全權負責，但過程中佢都不時參與監修及顧問工作，難怪咁神似啦！

面罩着燈營造電影感

買得呢兩款Figure，相信有唔少人都係謝生及余生嘅粉絲，就算佢哋以前冇玩開Figure，不過對偶像嘅頭雕要求，絕對唔會比資深玩家為低。EB就將呢個重要任務交畀SCUDERIA負責，並由YJ上色兼監督，大貨所見還原度幾高，特別係霆鋒好多個人特徵都還原得到，例如薄眼皮、高鼻樑、闊顴骨等，配合刻意加上嘅煙灰污漬，同真人一樣Chok到暈！反觀樂仔就有少少失色，雖然面形輪廓都算似，但係雙眼略嫌有神冇氣，扣咗啲分。除咗真人頭雕，隨盒附有一個戴咗防護面罩嘅頭雕，內有LED燈，重現戲中嘅臨場感覺。

超抵玩全身裝備

郭導表示，今次齣戲找嚟退役消防員做顧問，所以演員服裝及裝備都有根有據。如今化身1/6 Figure，EB亦自家開發咗全新嘅Fire Service消防服，同樣按真實嘅消防制服設計，有齊防護頭套、防護內衣、防護外套及吊帶防護長褲，當中外套及長褲仲有齊口袋、拉鏈、反光及螢光安全帶，做足Detail位，硬係要挑骨頭嘅話，就是表面冇咗戲服嘅格仔暗紋，否則就零瑕疵似到十足十。配件陣容亦見大堆頭，包括面罩、頭盔、電筒、救生繩、金屬製太平斧頭、金屬製氧氣筒連呼吸器及喉管等，講真淨係裝裝拆拆都有排你玩，比起依家只得一兩件Parts已經標價逾千銀嘅主流Figure抵玩好多。EB更加事先張揚，戲中另一大角任達華嘅Figure亦正全力開發中，華哥粉絲要儲定錢了！

查詢︰2332 3615（Enterbay）