唔提等如冇咗、諗咗就等於做咗，呢種政治思維，點會唔令人扯火？話時話，四年前Hot Toys推出《Iron Man 2》嘅鞭狂（Whiplash）時，大家都估佢會出埋片尾嘅重裝版Whiplash II，搞吓搞吓，依家連《The Avengers》及《Iron Man 3》都落晒畫，兼且Blu-ray都出埋，Whiplash II都仲係無影喎，唔通HT都學啲高官扮失憶側側膊？大家唔使擔心，原來廠方只係一直默默磨劍，未搞掂都唔敢Show出嚟住；今日終於大功告成，像真度高已經預咗，估唔到係孖鞭可以發光，連盔甲都加入合金（Diecast）成分，夠驚喜未？

圖中乃試辦作品，與最後完成品或者會有少許分別。

地台並非普通嘅黑底座，而係參考電影尾段於史塔克博覽會內激戰嘅情景設計而成。

Whiplash II嘅孖鞭終於對應LED着燈功能，加埋Figure全身多個着燈位，型到冇朋友！

胸甲備有正常及戰損兩款更換，至於Mickey Rourke嘅面相頭雕，就由Kojun及JC. Hong分別負責雕刻與塗裝。

腳掌設有仿油壓式嘅機關，唔只企得穩，仲增加埋外觀上嘅重裝效果。

裝甲唔只分件仔細，仲有多層舊化塗裝，加埋Diecast嘅質感，像真度實在冇得輸。

發光位置做到足

老老實實，香港嘅Figure品牌真係好爭氣，講咗就會做，一做就要做到最好，呢啲先係香港精神嘛！言歸正傳，Whiplash II為乜搞咁耐先出到？兩個字：發光！就以上一次嘅Whiplash為例，受技術所限，孖鞭做唔到發光效果，只能靠透明組件加特效Parts搭夠，對鍾意挑戰高難度嘅HT而言，當然唔可以畀同一道難題KO兩次。經過長時間研發後，終於喺Whiplash II身上玩齊發光功能，唔只孖鞭，仲有雙目、心臟、頸位到背部都可對應LED，基本上電影中Whiplash II着到燈嘅位置，HT嘅1/6版本都差唔多做齊晒。

重甲形象加Diecast

心水清嘅玩家或者會擔心，Whiplash II重甲上身，依家又要內藏LED同埋咁多電線，會唔會犧牲可動性？呢個就係HT花咗咁多時間開發嘅另一原因，成套甲都用咗複雜嘅分件處理，令造型美與可動性兼顧得到，就以腰位為例，用咗兩段式組合之餘，轉動幅度仲超過90°。除此之外，腳掌又有仿油壓式嘅機關，藉此增加接地能力，擺大動作甫士都企得穩，事關Whiplash II係品牌少有嘅Diecast作品，喺裝甲部分加入金屬，上身重咗，下盤關節自然都要加料。正所謂有心唔怕遲，誠意最重要，咁足料嘅Whiplash II，身為Iron Man超級粉絲者，不枉久等一場啦！

HT 《Iron Man 2》 MMS237D06 1/6 Whiplash II

零售價：$2,480

預訂價：$2,430

推出日期：預計明年第一至第二季

facebook專頁：www.facebook.com/hottoyssecretbase

查詢：3722 3988（Secret Base）